كود سعيد الشاوي كازا ///
علمت “كود” ان الفرقة الوطنية للشرطة القضائية ستامعات للملايري مول لفروماج والامين العام الجهوي لحزب الاصالة والمعاصرة عبد الرحيم بن الضو. القضية كيف هو قالها لصحابو، تضيف مصادر “كود” عندها علاقة بشي ارض شراها من عند سعيد الناصري رئيس الوداد السابق وللي كيتحاكم دابا فقضية عرفها الرأي العام وبدات بتصريحات للمالي “اسكوبار افريقيا”.
وفق مصادر “كود” هاد الارض كان شراها كيف كيقول هو ب7 مليار. دابا القضاء كيبحث فهاد القضية.
حسب محيط بن الضو، فهاد لملايري “ناعس على جنب الراحة” تضيف مصادر “كود” وباللي امورو مقادة وفوق هاد الشي الحزب محتاجو وما يمكنش يديرو ليه والو. شوفو وقاحة هاد الملايري اللي بدا بتهريب لفروماج قبل ما يولي زعيم سياسي رغم اميتو. دابا ياكما بن الضو مقدس؟ نتبعو القضية ونشوفو
للتذكير فبن الضو هاد ليام بدا ياخد مسافة من الناصري اللي كيدين ليه بشلى حوايج.
