سعيد الشاوي كود كازا //

بعدما قرر حزب تراكتور تزكية عثمان بادل باش يترشح بالانتخابات التشريعية القادمة بالدائرة الانتخابية سطات ، كشفت مصادر “كود” باللي لملايري مول لفضايح والفروماج والامين الجهوي السابق للتراكتور عبد الرحيم بن الضو بدا كينوعر داخل التنظميات الاقليمية لجهة كازا.

مول لفروماج اللي استقال من البام وحيد ليه القضاء الباسبور وسد عليه الحدود كيدعم ديناصور من ديناصورات الانتخابات.

حسب مصادر “كود” لملايري مول لفروماج كيوجد لعقد اجتماع مع وجوه قديمة وديناصورات الانتخابات كاعية على استثناءها من التزكية. من هادو اللي باغي يتلاقاهم العربي هرامي، رئيس جماعة سيدي حجاج بمنطقة مزاب باش يرشحو ولدو هشام هرامي اللي ديجا عضو فمجلس الجهة وما عمرو قدم شي حاجة لا للجهة ولا للمنطقة.

حسب مصادر “كود” فهاد هرامي كلف مستشار من التراكتور باش ايلى ما سمعوش منو يستاقل من الحزب ومن الجهة. طبعا باغي يمشي لشي حزب. هاد الكائنات تموت ايلى ما ربحاتش فالانتخابات.

دابا هاد لملايري مول لفروماج اللي عندو قضية مفتوحة خانزة اش كيقلب؟ اللي باقي ليه راه معروف. خاصو متابعة فحالة اعتقال بالنظر للقضايا اللي كيحققو معاه فيها