الدار البيضاء و م ع////

البارح فحي “سي اف سي” فكازا كانت شاخضة فسهرات مهرجان “دجازا بلانكا” فكازا. سهرة واعرة دارها گروب وفنانين واعرين: “بلاك آيد بيز” و”كارافان بالاس” و”نوبيا غارسيا”

البارح كان الالكترو ماشي دجاز. كانت الحيحة ماشي الجدبة. مجموعة “كاراڤان پالاص” الفرنسية حيحات. لاعبة للملايرية واللي لاصقين فيها. لاعبين فدارهم. بورجوازيتنا كتآمن بفرانسا المريضة اليوم كثر من المغرب. عادي يكون اعجاب كبير بيهم. هنا هاد البورجوازية اللي دارو ليها مهرجان ديالها، كتجمع لفلوس وترفح ولكن ولاءها لباريس.

هاد الشي كيبان فهاد المهرجان اللي فيه امور ايجابية اخرى. فيه نفس كبير للحرية. فين فنانين قافزين.

كلشي كان يتسنى فرقة “بلاك آيد بيز” الأمريكية، اللي قدمات لهاد لملايرية واللي لاصقين فيهم وكيديرو كلشي باش يعجبوهم، اشهر اغانيها. هاد الفرقة راها باعت كثر من 35 مليون ألبوم و120 مليون أغنية فردية

طبعا باش يفكر المهرجان هاد لملايرية باللي راه فالمغرب مرة مرة كيجيب فنان كيجمع بين كنازة مع ايقاعات اخرى بحال ما دار مهدي قاموم، الملقب بـ Medicament خلط بين ايقاعات كناوية امازيغية ودالجازوالفانك

لملايرية مازال مهرجانهم طويل. مازال لياليهم طويلة فالقطب المالي فكازا. هاد المهرجان خاص مديرية الضرائب ترسل فرقة ديالها. تشوف وتسول هاد لملايرية كيفاش شراو دوك لماگن الغاليين بزاف. الرجالة يتبعو غير الماگانات اللي دايرين ولعيالات بالاضافة للساعات يتبعو معاهم كيفاش شراو دوك الصيطان. اللي مخلص بالقانون مرحبا واللي مهرب لفلوس باش يشري هاد الشي يضربوه بذعيرة. ياك الدولة ما عندها فلوس. راها فرصة يزيدو فالمداخيل