كود سعيد الشاوي وهناء ابو علي ///

فجلسة فڤيلا بحال هادوك اللي اتهمات فيها المواطنة الفرنسية كميل بنيس ولد الراحل باطرون “لاپروفان” ليلة السبت الاحد 2 و3 نونبر 2024 فزنقة مضيق جبل طارق فانفا العليا بكازا٬ دخل ملايري وعلق على قضية بيد قاضي التحقيق٬ “الله يحفظ وليداتنا غاديين يتكرفصو مساكن فعكاشة”.

كان كيقصد قرار الوكيل العام فكازا ول البارح السبت 23 نونبر 2024 اللي حال كل من كميل بنيس وامحمد لعلج وسعد السلاوي على قاضي التحقيق اللي قرر يستاجب لملتمسو باش يتحقق معاهم فقضية الاغتصاب وهما فسجن عكاشة.

لملايري كان مقلق على اعتقال “وليداتو” اي وليدات لملايرية بحالو. هادا كيعطي صورة على نوعية هاد لملايرية.

طبعا كلامو ماشي استتثناء تماك بل هو القاعدة. ملايرية عايشين فبرجهم العاجي كيشوفو لمغاربة بحال شي دبان. عقلتو على هاداك اللي دخل فشاب فعين الدياب وقتلو. هادوك هما: ايلى قلقتيه فالطريق يقتلك.

هاد الشي تأكد فهاد القضية واكثر من مرة. باش تشدو هادو السيمانا اللي فاتت٬ وفق مصادر “كود” فالكوميسارية كانو هاد الثلاثة كيهدرو باستعلاء كبير. كانو متيقنين باللي عندهم السلطة الكافية باش حتى الشرطة اللي ستمعات ليهم باشراف النيابة العامة٬ تخاف منهم. شوية بالشوية عاد هبطو كواريهم. تفشو. 

من بعد باواتهم وعائلاتهم من لخميس اللي فات حتى قرار قاضي التحقيق نهار السبت٬ وهما كيتاصلو. عيطو على كلشي الشخصيات ديال الدولة اللي كيعرفوها. “بقاو يعيطو حتى شي وحدين ما بقاوش يجاوبوهم” يحكي مصدر ل”كود”. هدفهم ما كانش واش هادوك مذنبين واش هادوك اغتصابو. اللا هدفهم: ولادهم يخرجو وطز فالقضاء والعدالة. ولفو كلشي خدام عندهم. 

التسجيلات الصوتية ديال جوج حقراء كيعقلو على هاد القضية  واحد كان فديك الليلة والثاني ما حضرش وبجوجهم ولاد لملايرية كيتكشف معدنهم الحقير. بجوجهم مبرراتهم كتكشف المعدن ديالهم. كيقولو باللي ما غتصبهاش وباللي هي اللي جبداتو =كيهدرو على كميل بنيس= وباللي عندها سوابق. 

تصورو هاد لملايرية كيعتاقدو ان لبنات مشاع يديرو فيه اللي بغاو. زادو باللي “كون ما كانش فرنساوية” ما كان غادي يوقع والو. 
شوفو فين وصلو فتصورهم فالافلات من العقاب. 

هادو دابا باغيين ينيكو لمغاربة كلهم. كيفتاخرو باللي عندو سوابق وفيها القتل ديال شي حد فبوزنيقة. واش حادثة سير ولا قتل عمد هاداك فيلم اخر. كيفتاخرو باللي عندو سلاح. 

فكلام هادو وباواتهم وصحابهم كيهدرو كلشي للي يخرج ولادهم. الثقة فالقضاء والمطالبة بمحاكمة عادلة هادي شعارات. هما فوق القانون وفوق الدولة. 

دولة انفا العليا ما خاصها عدالة ايلى ولادهم دارو شي جرم. ولاو يتعاقدو باللي حتى حد ما يقرب منهم. 

الاصرار علي تطبيق القانون صطاهم اليوم. خربق تصورهم للدولة. عليها بداو يدعيو “الله يحفظ وليداتنا” كيقصدو “بغينا وليداتنا يغتاصبو كلشي وحتى حد ما يقرب منهم