كود هناء ابو علي ت حسني دكالي ////

البارح فمعلب مولاي الحسن بالرباط كان يوم للتاريخ. يوم للصداقة المغربية الجزائرية بين الشعبين. مغاربة جاو يدعمو اول مباراة لمنتخبهم لدورة كأس افريقيا ضد السودان. حضر 16115 غالبيتهم جزائريين ومغاربة باش يشجعو صحاب رياض محرز. ما خرجوش نادمين وربحو ب3 لزيرو. قبل الماتش وحتى طيلة اطوارو كانت “خاوا. خاوا”. مغاربة يتصورو مع الراية الجزائرية او هازينها فكتافهم. جزائريون هازين الراية المغربية ويتصورو معاها. اللي حضر فالتيران قبل وبعد شاف هاد الاجواء الاخوية لكبيرة.

كانت مشاكل تنظيمية دارت بغباء فهاد الملعب قبل ما يتضرب السونتر، خلات الزحام والدافيع، ولكن هاد الشي خلى “خاوا خاوا” هي اللي ربحات. كلشي حافظ على هدوءو ودخل وشجع المنتخب الجزائري وكلشي فرح.

شفنا وكالات عالمية وصحف دولية ركزات على ميساجات “خاوا خاوا”. على تشجيع مغاربة لمنتخب حكامو ولاو متخصصين فسب بلادنا. قاطعين معانا العلاقات الديبلوماسية ومانعين حتى طياراتنا دوز فوق مجالهم الجوي. طبعا بلا ما نهدرو على اغلاق الحدود. شفنا جزائريين مرحب بيهم وبزاف فاسواق الرباط وغيرها من المدن المغربية. كيدورو هازين درابواتهم وفرحانين ولمغاربة كيستقبلوهم بكرم هاد لبلاد.

شفنا اكاديمية محمد السادس لكرة القدم تفتحات للمنتخب الجزائري فسابقة ما عمرها كانت، باش يدربو. ولكن واش عرفتو كيفاش كان رد صحافتهم؟ كان حقير ووضيع. اليد المدودة لسيدنا فاكثر من خطاب ليهم واليد الممدودة لشعبنا لمنتخبهم ولجمهورهم قابلو حقارة صحفهم.

“الشروق” فمقال رأي كتبو عبد الناصر بن عيسى 22 دجنبر 2025 لخص هاد المرض. ادعى ان الوفد الرياضي الجزائري غادي يعيش “وضاعة الاستفزازات” وان هادي محاولة ” ليس من أجل إبعاده فقط عن تركيزه، وإنما في محاولة للرفع من حالة العداء”

ومشى فهرطقانو اللي كتعكس كيفاش كيفكرو حكامهم باللي “الذين ظنوا أن رحلة المنتخب الجزائري لكرة القدم إلى الرباط ستمرّ بسلام، مخطئون على طول الخط؛ فبعد أن كانت مملكة مراكش محصّنة نفسها بسرب من الذباب الناقل للجراثيم، الذي لا يتوقف عن الأزيز، حوّلت الآن كل بلاد مراكش إلى ذباب، وواضح بأن تحضيراتها لاستفزاز الجزائريين قد حضّر لها منذ أشهر عديدة من خلال استعمال بعض الخونة وبائعي كرامتهم، ومن خلال خطط فيها الكثير من الوضاعة”.

طبعا سبنا وسب المخزن ودخل فحقارات كثيرة. هاد الجريدة ما كتبات والى كلمة على اجواء ماتش البارح من غير النتيجة. جريدة “النهار” هدرات على الكورة والكورة ولا اشارة لدعم الجمهور المغربي للمنتخب الجزائري. حتى الصور ديال العلم المغربي مع الجزائري دارت اللي فجهدها باش ما تبانش. والو. منتخبهم ربح وتصريحات للعابة والمدرب وسالات مادام. طبعا فالتنظيم دارو تقلاز من تحت الجلابية باش كتبو باللي الاتحاد الجزائري لكرة القدم ضغط على الكاف باش يتفتح بيع بيي ماتش بلادهم الثاني فكأس افريقيا ضد بوركينا فاسو، وكتبات باللي “قضية تذاكر لقاء الجزائر والسودان الكثير من الجدل، ووضعت “الكاف” أمام اختبار صارت تسقط فيه في كل دورة تقريبا. تفاجأ الجزائريون، أمس، بمشهد مدرجات ملعب مولاي الحسن بالرباط، حيث استهل أشبال فلاديمير بيتكوفيتش مغامرتهم الإفريقية بفوز أمام السودان بثلاثية نظيفة، شبه فارغة”. طبعا هادي كذبة. الملعب كيهز عشرين الف واحد وحضرات 16 الف و115 بالضبط. يعني كان حضور كبير. لكن هما ديما كيقلبو على المشاكل. ممكن جدا عدد من الجمهور شرا التذاكر وما قدرش يدخل لانو ما عندوش فان ايدي الضرورية باش تدخل للتيران او عندهم ظروف خلاتهم ما يحضروش. العدد ماشي كثير اللي ما جاوش. ممكن تكون حصة جمهور السودان للي ما تباعتش. راه الجزائر لعبات ضد السودان وجمهور هاد الدولة من حقو يكون عندو نسبة من التذاكر تخصص ليه

المهم قلبو على كلشي الا على اللي كيجمع الشعبين. حتى جريدتهم “كل شيء على الجزائر” فنسختيها العربية والفرنسية ما جبدات فماتش البارح والو من غير التصريحات. لا صورة وحدة على التعامل المغربي الراقي مع الجزائريين. 

هاد الصحافيين اللي حضرو للمغرب لتغطية الكان بحال ايلى عندهم مهمة وحدة. واياكم تجبدو بالي لمغاربة رحبو بيكم. واياكم تقولو باللي ملكهم شرف منتخبنا بشرف غير مسبوق وفتح ليه اكاديمية محمد السادس باش يتريني. واياكم شي صورة ديال راية مغربية مع راية جزائرية. صحافة دولة كلها مخطوفة كيتحكم فيها شنقريحة واللي معاه.