كود – سبور //
فـمنتدى دولي على الرياضة تدار فالبرلمان البارح 18 دجنبر 2025، يونس المشرافي، المدير العام ديال المغربية للألعاب والرياضة، حذّر من الانتشار الكبير ديال القمر الغير القانوني فالمجال الرياضي، واعتبرو خطر كيمسّ مالية الدولة، المشرافي وضّح باللي المؤسسة اللي كيسير خدامة بنظام ديال الحكامة والشفافية، وكتخضع لمراقبة الدولة وتتبع المجلس الأعلى للحسابات، الشي اللي كيسمح بتدبير باين ومسؤول لمداهيل لي كتمشي لدعم الرياضة الوطنية. وأكد أن القمر فنوار كيضرب هاد المجهودات وكيضرّ بالاقتصاد وكيستهدف فئات ضعيفة بحال الشباب والعائلات.
وزاد وضح باللي مجلس إدارة المغربية للألعاب والرياضة فيه مؤسسات رسمية بحال وزارة المالية، الجامعة الملكية لكرة القدم، وصندوق الإيداع والتدبير، ووزير التربية الوطنية والتعليم الأولي والرياضة هو أمين المال، وهادشي كيبين الطابع المؤسساتي والرقابي ديالها.
ومن ناحية الأرقام، كشف المشرافي باللي المساهمات ديال المؤسسة فالصندوق الوطني لتنمية الرياضة ومساهمات أخرى للدولة وصلات عام 2024 لـ 791 مليون درهم، وبمساهمات لفائدة الدولة لـب8.8 مليار درهم، وزيد عليهم 2.8 مليار درهم من ضرائب ورسوم وصناديق التضامن، بحال ديال كوفيد وزلزال الحوز.