محمد سقراط-كود///
لماذا فشل المغرب في بناء مدن وحواضر حقيقية؟ علما أننا ماشي دولة حديثة بل العكس، المغرب بلاد ضاربة في عمق التاريخ وعرفات امبراطوريات ودول كانت هي المسيطرة في المنطقة، وعوض عاصمة وحدة المغرب فيها اربع عواصم امبراطورية، وفيه مدن فايتة الألف سنة ومع ذلك مظاهر التمدن قليلة بزاف في البلاد، خصوصا في المدن الكبرى ولي من المفروض انها مدن الحركة فيها دايرة وناسها شبعانين وخدامين ومدورين الصرف، ومع ذلك راه مكاينش فرق بين السلوكات لي غادي تشوفها في شارع محمد الخامس في كازا وأي شارع في سوق لاربع او دار الگداري أو سيدي بوعثمان او بوذنيب، غادي تشم ريحة البول من الركاني غادي تلقى الطوموبيلات مسطاليين فوق الطروطوار، غادي تلقى بنادم كيلوح الزبل في الشارع، الماطر مكيوقفوش في الضو حمر، بنادم كيقطع الشانطي حال فمو من أي بلاصة، نفس هادشي غادي تشوفوا في أي مدينة سواء كبيرة او صغيرة في المغرب النافع او المنسي، طبعا من غير الرباط قلال فيها هاد الظواهر.
مدن بحال طنجة مثلا لي كانت عاصمة للفكر والثقافة والجواسيس والاثرياء من العالم، وعاصمة لنمط العيش المتوسطي الهادئ والجميل والمحفز على الابداع، ولات بحال شي مدينة صناعية في الهند، الالف ديال الشباب حدهم الثانوي كثرو من القراية، راكبين على صانية وكيضلو يخيطو في الزناقي، عشرات سيارات نقل العمال كتدير الرالي يوميا، طواكسية باغين يجيبو الروسيطا ديال لويس هاميلتون، احياء عشوائية غير متناهية على مد البصر وكل عام كيتزاد حي جديد، مشاريع ديال البنية التحتية عبارة على عملية لقتل كل ماهو جميل في هاد المدينة ابتداء من كورنيش طنجة السابق لي كان كلو نشاط وحياة وتحول لساحة ديال النقاشات والخرباقة، راه خاص المغاربة شعبا ودولة يراجعوا راسهم ويشوفوا هاد الجرائم لي كترتاكب في حق البلاد باسم التنمية والرواج.
على مايبدو ان التخطيط الحضري والعمراني غير إشاعة في المغرب، واه خاص يوقع واحد التغيير جدري حقيقي بحال لي دار هوسمان في باريس باش ولات اجمل مدينة في العالم ليومنا هذا، خاص احياء كلها تريب ويتم ترحيل ناسها لأحياء جديدة تبنى وتصمم بطرق تحتارم الإنسانية، مدينة بحال فاس مثلا لي كلها كانت جنانات وجرادي وبساتين وكاين واد دايز وسطها وفي ممنطقة من المفروض تكون ملها خضورة ، كتجي تطل عليها كتبان ليك كلها صفرا، احياء على قدها ماتلقلش فيها شجرة وحدة بحال الى في الصحرا وحنا راه بين جبال الاطلس، في منطقة كلها سدود وعيون ومنابع مائية، المدينة الوحيدة حاليا لي يمكن تقول عليها حضارية في المغرب هي الرباط خاص تخاد نمودج ويتم تعميمو في المغرب كامل.
