كود ـ سبور//

أكد الإطار الوطني عبد السلام وادو اللي جراو عليه مولودية وجدة قبل 3 سنوات، أنه عندو إمكانيات محترمة وهذا الشي مشى بينو فالادغال الافريقية وربح لقب وسط الكونگو الديمقراطية، فالوقت اللي انتهى المطاف بالفريق الوجدي إلى النزول للقسم الوطني الثاني بعد سنوات ديال سوء التسيير.

ونجح عبد السلام وادو فتحقيق أول لقب له فالمسار ديالو كمدرب، وقدر يربح كاس الكونگو الديمقراطية مع فريق فيتا كلوب الكونگولي اللي كيشرف على التدريب ديالو هذا الموسم، وجا هذا التتويج بعدما ربحو فالفينال فريق إف سي سيليستي بنتيجة واحد لزيرو، وقدرو بهذا التتويج يرجعو للساحة الافريقية وغايلعبو كاس الكونفدرالية الموسم المقبل.

للإشارة فعبد السلام واد وخلال التجربة ديالو مع مولودية وجدة اللي كان فيها محمد هوار هو رئيس النادي، ما طولش معهم بزاف، وناضو فسخو العقد معه، وهو دعاهم للطاس وربحهم بحكم يقضي انهم يخلصو له حوالي مليار سنتيم، ودابا الفريق اللي نزل رسميا هذا الموسم للقسم الثاني مهدد بالنزول للأقسام السفلى إذا ما خلصوش هذا الحكم للمدرب وادو.