نجوى المالحي-كود//

للسنة الثالثة على التوالي، المغرب غادي يكون محطة للمؤتمر العالمي ديال الفلامينكو، اللي كينظموه معهد ثيربانتيس. هاد المبادرة كتسعى باش تقرب الفن الإسباني الأصيل للجمهور المغربي، وتعرفهم على فن الفلامينكو العالمي.

المؤتمر كيتنظم بشراكة ما بين السفارة الإسبانية ومعهد ثيربانتيس، وبمساعدة وزارة الثقافة الإسبانية في إطار خطة الانتعاش والتحول اللي كيمولها الاتحاد الأوروبي. كاين دعم وتعاون كذلك من طرف وزارة الشباب والثقافة والتواصل المغربية، وعدة مؤسسات محلية.

هاد المهرجان غادي يقدم 13 عرض فني عبر 7 مدن مغربية: الرباط، الدار البيضاء، مكناس، طنجة، تطوان، مراكش وأكادير. بالإضافة، غادي تكون ورشات عمل، ندوات، وعروض لأفلام وثائقية.

النسخة ديال هاد العام كتتميز بحضور نسوي قوي وبالتزامها بالفلامينكو المبتكر، مع التمسك بجذور هاد الفن العريق اللي كيرجع لقرون.

من بين الأسماء المشاركة، عندنا صوليا مورينتي، اللي هي بنت الفنان إنريكي مورينتي، واحد من كبار مبدعي الفلامينكو المعاصر، وكتقدم أسلوب ديالها اللي كيخلط الفلامينكو مع الروك، البوب، والرومبا. غادي يرافقها في العزف على الغيتار خوسيمي كارمونا، اللي هو من عائلة “هابيتشويلا” وعضو في مجموعة “كتامة” المعروفة.

كذلك عندنا روثيو ماركيث، اللي تعتبر من أبرز الفنانين في عالم الفلامينكو في القرن الواحد والعشرين، وغادي تقدم “السماء الثالثة”، عرض فني مميز كيشارك فيه فنان الموسيقى الإلكترونية برونكويو.

فرقة “لابوراطوريا”، وهي خماسية نسوية، غادي تقدم عرض استثنائي كيتميز بالتجريب الفني وتفكيك الأدوار في الفلامينكو النسوي.

عندنا أيضا عرض “أندانثاس” لعازفة الغيتار أنطونيا خيمينيث والراقصة روساريو طوليدو، اللي كيقدموا حوار فني حميمي بين الغيتار والرقص، كيشد الأنفاس.

المتألقة ماريا باخيس، اللي فازت بجائزة أميرة أستورياس للفنون سنة 2022، غادي تعرض الفيلم الوثائقي “رقصة الكيميائية”، اللي كيكشف عن العمق الإبداعي ديالها، وغادي تقدم من بعد الفيلم عرض خاص.

وزيد على هادشي، المخرج خوسي سانتشيث مونتيس غادي يقدم جوج أفلام وثائقية كيستوحيو من ألبومين مهمين في تاريخ الفلامينكو المعاصر: “أسطورة الزمان” لكامارون دي لا إيسلا، و”أوميغا” لإنريكي مورينتي.

للناس اللي باغين يدخلوا لعالم الفلامينكو، غادي تكون ورشة عمل مع الشاعر والمتخصص خوان خوسي تاييث وعازف الغيتار سالبادور أندرادا، باش يعلموهم أبجديات هاد الفن.

بهاد البرنامج الغني والمتنوع، المغرب غادي يتحول فشهر نونبر لمركز عالمي للفلامينكو.