فاطنة لويزا – كود//

شي صديقات ديالي، لاحظو عليا بلي عيقت شوية على الشريفة للا فاطمة الزهراء المنصوري بنت الباشا، ومرات الشريف بركة حفيد مولاي عبد السلام بن مشيش.

وكينبهوني أن هاد الشي يقد يضر بصورة المشاركة السياسية للنساء، على اعتبار أن عدد النساء لي كيتصدرو المشهد السياسي في بلادنا قلال، وخاص حنا النساء المؤمنات بالمساواة الفعلية أننا نتضامنو مع بعضنا، وما فيها باس أننا مرة مرة نديرو عين ميكا إذا كانت شي انزياحات عند الرفيقات ديالنا.

والصراحة أنهم قنعوني، وحسيت بشوية ديال تأنيب الضمير، وفكرت أنه كاين بزاف ديال بوركابي دايرين الزبايل، فين تبان أخطاء المنصوري.

ولكن هي لي مكتخليناش نميكو عليها للأسف، حيت كاين شي ممارسات ما خاصش التساهل معها.

وهادشي عندو علاقة حتى بصورتنا كنساء.

حيت واحد الحاجة خايبة كاينة فهاد موضوع المشاركة السياسية للنساء.

وهو أنه باقي كيتم التعامل معنا بدونية، وبأننا باقي كنتعلمو، وخاص التساهل مع الأخطاء لي ممكن ترتكبها النساء.

لا، أ للا وأسيدي.

النساء مكيتعلموش الحسانة في ريوس اليتامى.

والنساء فهاد البلاد السعيدة قادات، وما محتاجاش للهدايا.

ولذلك خاص مواجهة هاد منطق الهدايا.

وخصوصا ملي كيكون معشش عند بعض النساء، لي تعطاتوم أكثر من فرصة، وللأسف ديما كيردونا للور.

علاش كنقول بلي كيردونا للور؟

حيت النضال النسوي في العالم كله خاص يكون ضد كل أشكال المركزيات، وضد إعادة إنتاج الأنماط لي أدت إلى هاد التراتبية الاجتماعية والثقافية لي كتعطي قيمة للرجل مقارنة بالمرأة.

السيدة فاطمة الزهراء المنصوري للأسف من هاد الصنف لي كيعمل على إعادة إنتاج الذكورية والأبوية لي هوما سبب رئيس في اضطهاد تاريخي للنساء.

نعطي مثال فقط، هاد السيدة ديما كتستحضر منطق النسب الشريف، وأنها بنت الشأن والباع، وبنت الدار الكبيرة.

وكيعجبها الحال فاش كيعيطوليها الشريفة.

تصور أنه في بلاصة السيدة الأمينة للحزب كاين لي كيخاطبها بالشريفة.

وفي بلاصة السيدة العمدة، كاين موظفين ومواطنين كذلك كيخاطبوها بالشريفة، وهي عاجبها الحال.

ونفس الأمر في الوزارة.

دابا فينا هي الحداثة؟

الحداثة لي كتربط الصفة بالمهام، ماشي بالأصل.

الملك لي حتى واحد ما كيشك في أنه شريف حقيقي، وكنخاطبوه في مهامه السياسية بجلالة الملك، وفي مهامه الدينية بأمير المؤمنين، والدستور يعرفة برئيس الدولة، وما عمرني انا سمعت شي حد خاطب الملك بالشريف وهو يباشر مهامه السياسية والدينية.

أما السيدة فاطمة الزهراء المنصوري ماشي غير كتنتشي بلقب الشريف، وهي لي كتسبق وتفكرك بلي راه شريفة، على نمط ديك العبارة المألوفة في الخصومات: واش عارف راسك مع من كتدوي.

حتى في خلاف راجلها نبيل بركة سليل الشرفاء العلميين مع رئيس جماعة تازروت أحمد الوهابي حول عقارات في ملكية الجماعة كانت كارياهوم عائلة راجلها بلا متخلص فرنك.

في بلاصة ما تنسى أنها شريفة مرات الشريف، وتفكر بمنطق الحق، وحتى بالمنطق الحزبي، كون رئيس الجماعة براسو من حزبها.

ما نتاصراتش للمؤسسة، انتصرت للعلاقات القرابية، وخرجات ورقة الشورفا.

وحتى هاد ليام، كاين واحد الموسم في بلاد راجلها، سميتو “ماطا”، وهو تقليد زوين الصراحة في منطقة جبالة، وماشي مشكل انه ياخوذ دعم من وزارة السياحة ووزارة الثقافة، ولكن باش ياخود دعم من مؤسسة العمران لي رئيسة المجلس الإداري ديالها هي المنصوري باعتبارها الوزيرة الوصية على القطاع، فأمر لا يدخل إلا في باب استغلال النفوذ، خصوصا أن راجلها هو المسؤول على هاد المهرجان ديال “ماطا”.

أش دخل العمران في مهرجان في منطقة قروية، لا يتدخل فيها العمران؟ شنا هوما المهرجانات القروية لي سبق للعمران أنها مولاتها؟

فاطمة الزهراء المنصوري كتروج لدابا أنها غتكون رئيسة الحكومة المقبلة، وكتستغل وضعها كامرأة.

زعما ديك اللعبة ديال أن المغرب غيربح في تحسين صورته إذا طلع امرأة رئيسة حكومة.

حنا ما كراهناش امرأة رئيسة حكومة، حتى خارج بلادنا كنفرحو فاش شي امرأة كترأس حكومة، فما بالك في بلادنا.

غير هو ، واش فاطمة الزهراء المنصوري عندها مؤهلات ديال ميركيل ولا أنديرا غاندي ولا هاريس،

واش عمرنا حضرنا شي ندوة صحافية ديال المنصوري بلا متجيب تستيفة ديال لي غيجاوبو فبلاصتها على الأسئلة المحرجة، وللأسف كلهم رجال.

واش دازت من شي تجربة حزبية أو نقابية أو طلابية أو جمعوية في شبابها؟

شكون كان كيعرفها حتى تم إنزالها بالباراشوت.

حتى في ميدان المحاماة لي هو طريق منو انطلق سياسيين معروفين بحال اليوسفي وأحمد بنجلون، وادريس لشكر، ومحمد اليازغي، ومولاي احمد الخليفة، والمصطفى الرميد والمعطي بوعبيد وعبد الرحمان بنعمرو وحتى أمينها العام السابق عبد اللطيف وهبي.

حتى فهاد الميدان معندها حتى حضور، وخصوصا في جمعية هيآت المحامين.

أكثر من ذلك حتى في النقاشات العمومية لي عندها ارتباط بميدان القانون، بحال قانون الأسرة، والقانون الجنائي، وقانون الإضراب، عمرنا سمعنا شي مرافعة قانونية سياسية ديال هاد السيدة.

نرجعو لرئاسة الحكومة.

نفرضو أن البا مجا في المقدمة، واخا هادشي مستبعد، حيت فاش كتشوف تحركات الأحزاب من أجل تحسين مواقعها الانتخابية العام الجاي، غنلقاو تحركات مدروسة ديال التجمع الوطني للأحرار لي طلع الريتم ديال التحركات ديالو، ولي معممة على جهات مختلفة، وغنلقاو بلي الاستقلال واخا المشاكل التنظيمية ولكن غادي وهو كيرفع في الوتيرة ديال الأنشطة الجماهيرية ديالو، وغنلقاو حتى البيجيدي لي عارف راسو مغيكونش في الحكومة المقبلة، ولكن خالق الشو باش يحسن النتائج ديالو، وكيراهن على أنه يكون الجزب رقم واحد في المعارضة، ويرجع الفريق البرلماني ديالو.

قلنا، حتى لو افترضنا أن البام تصدر الانتخابات بشي معجزة أو ضربة حظـ، فراه عندو ثلاثة ديال الأمناء العامين، وفهاد الحالة الملك غيتعين عليه يرجح واحد من دوك الثلاثة إذا أراد ان يحافظ على العرف ديال تسمية رئيس الحزب المتصدر للانتخابات رئيسا للحكومة، أو أنه يختار من خارج هاد التركيبة الثلاثة، شريطة ان يكون منتسبا للبام، والدستور يسمح له بذلك.

إذا خدينا القيادة الثلاثية، وقارنا البروفايلات ديالهوم، فغنلقاو المهدي بنسعيد مثلا عندو مؤهلات لي ما عندش فاطمة الزهراء المنصوري.

أولا جاي من عائلة سياسية، حيت باه ومو مناضلين يساريين جذريين، يعني السيد تربى مع الخيخ ديال مناضلي اليسار الراديكالي لي كانو ديما في دارهوم، وكبر فالجمعية المغربية لحقوق الإنسان، واشتغل فشلا جمعيات مدنية ذات أهداف سياسية سواء في المغرب أو فرنسا، راه كان منسق ديال مبادرات لدعم الشعب الفلسطيني فاش كان كيقرا في فرنسا.

وحتى الدينامية لي فرزات البام كان فيها من الأول، أي من أيام حركة لكل الديموقراطيين.

وعندو حضور في النقاش العمومي في قضايا الشباب والديموقراطية وحقوق الإنسان والحريات الفردية والصحافة، ومكيتهربش من الندوات الصحافية أو الحوارات مع الإعلام، بما فيه الحوارات المباشرة.

وعندو حضور في الديناميات الشبابية، وحتى بمنطق حكومة المونديال، هو أقرب إلى حقل الرياضة.

انا مكندافعش على بنسعيد، لي عندي عليه شلا ملاحظات، ولكن غير كندير ملاحظات مقارنةـ باش نوصل إلى أنه ما يكفيش أنك تكوني امرأة فقط.

مؤخرا دارت فاطمة الزهراء المنصوري واحد الخطأ تواصلي، وهو أنها في البرلمان جاوبت وهي جالسة، وبررت ذلك بأنها مريضة، وأنه حتى الصلاة كتصلي جالسة.

الله يشافي.

كان ممكن هاد الجواب يكون لصالحها، بمعنى انه رغم المرض كتجي للبرلمان دير خدمتها.

لكن العشية مشات تحتفل مع الكوكب المراكشي بمناسبة صعوده للقسم الأول، وهي تنسا راسها، وتوقف تضرب الرش على إيقاعات الدقة المراكشية، وبانت في كامل صحتها.

إيوا لي حرثو الجمل دكو، تحول ديك التعاطف معها بسبب المرض لي قالت، إلى سخرية عارمة في مواقع التواصل الاجتماعي.

غير هو على ذكر صعود الكوكب المراكشي لي كيمثل المدينة لي هي العمدة ديالها، فراه طلع للقسم الأول حتى اتحاد يعقوب المنصور لي الرئيس ديالو هو المهدي بنسعيد.

وهادا يعني ان المهدي بنسعيد والمنصوري جابو التعادل في المنافسة حول الصعود للقسم الأول، وللمصادفة حتى المقابلة الأخيرة كانت بين الكوكب واتحاد يعقوب المنصور انتهت بالتعادل.

فكيفاش غتكون نتيجة الصراع بيناتهوم للرئاسة الفعلية للحزب؟

مع التذكير أن المهدي بنسعيد واكب عن قرب صعود الفريق ديالو للقسم الأول، وضرب تمارة عليه، في حين فاطمة الزهراء غير الصدفة لي خلاتها تكون مشاركة في احتفالات الكوكاب حيت هي العمدة.