كود سبور//

كشف ايميليانو مارتينيز حارس مرمى منتخب الأرجنتين أن الحركة اللي قام بها من بعدما استلم جائزة أحسن كول فكأس العالم قطر 2022، بعد ماتش الفينال اللي توج به بطل للعالم مع منتخب بلادو جات كردت فعل ضد الفرنسيين.

لكول ديال منتخب الأرجنتين علق على الطريقة اللي شد بها جائزة أحسن كول، واللي اعتبروها بزاف ديال المتتبعين بأنها غير رياضية وكاين اللي شافها ماشي أخلاقية، وكشف السبب اللي خلاه يقوم بها وقال فتصريح لراديو “لاريد” الأرجنتيني: “درت هاكاك حيث الجماهير الفرنسية بداو كيستهزؤ بيا فالماتش، وأنا ما نقدرش نتحمل شي حد يتكبر عليا”.

وخلق حارس الأرجنتين مارتينيز  اللي عندو 30 عام، جدل كبير من بعدما احتفل بجائزة أفضل حارس كأس العالم بهاديك الطريقة، قدام العالم وبحضور أمير قطر تميم بن حمد إل ثاني، مع العلم أنه قدم مونديال واعر، وكان من أسباب تتويج المنتخب الأرجنتيني بكأس العالم 2022، بالمستوى الكبير اللي قدم طيلة البطولة.