كود سعيد الشاوي ///
قبل لعيد لكبير تعرضات جوج بنات للشفرة. الاولى وصلات لكازا ڤواياجور, بغات تاخد طاكسي صغير. مع الفوضى والابتزاز اللي كيديروه، بعدات منهم شوية، جا شي حد من وراها بموطور وطير ليها الصاك فيه اغراضها ورزقها وخلاها فحالة خايبة. مشات واخا فهاديك الحالة الصعيبة دارت شكاية. هاد الشي بنهار. هادوك اللي كيعمرو فمحطة المسافرين مولفين على شفارة خطيف الصيكان. قبل اسابيع كانت “كود” حضرات لشفرة بحالها. خطف ليها شفار بموطور مع صحابو صاك بنت حدا اوطيل “ايبيس” اي قدام المحطة. هرب من حداها ومشى. تماك كاين رجال القوات العمومية. كاينة الكاميرات. لفضيحة هو المشهد كيتعاود.
فنفس الفترة قبل رمضان تعرضات رباطية للشفرة مع العشرة الليل فشارع الحسن الاول حدا اوطيل “كان” اللي كان سميتو الموحدين. جا شي حد من بعد الشهادات غاديين يوصفوه باللي غليظ وعندو لحية صغيرة وساكن فالمدينة لقديمة. شهادات اخرى جمعاتها “كود” لضحايا هاد الشفرة بالخطيف وعلى غلفة، اكدات باللي نفس الشفار كان حاول يخطف صاك صيدلانية حدا ريسطو “الشاف احمد” فشارع انفا. الصيدلانية ما طلقاتش الصاك. غير الشفار كان دا تلفون لشي سيدة اعمال عندها محل التوب فرومبوان دي سبور. ما خلات لمن قالتها وعرفات باللي هاداك معروف عند كلشي وعندو سوابق وكيتشد ويخرج ويشفر. تلفون سيدة الاعمال ما رجعش.
الرباطية اللي تشفر ليها صاك احمر من قبل الشفار لغليظ اللي عندو موطور عادي كان هرب من الزناقي اللي حدا المسرح الكبير وكمل فشارع الراشيدي انتيردي ومن ساحة الاخوة دخل لشارع انفا وغالبا دخل للمدينة لقديمة.
طبعا كاين حالات اخرى اللي كيتشفرو وما كيقدموش شكايات. فحالة الرباطية دارت وحدة. غير حتى طريقة تقديم الشكاية خاصها تتغير. شي حد معرض للشفرة. مشى ليه كلشي حتى سوارت دارو وهويتو وتلفوناتو…. علاش خاصو يمشي للكومسيارية اللي ما مجهزاش لاستقبال حالات نفسية كتكون منهارة بعد الشفرة بالخطيف. خاص يتغير كلشي. كاين بلات فورم اون لاين ممكن للمغربية والمغربي يمشي ليهم ويقدم شكايتو. راه تحط شكاية بعد دقايق من الشفرة اللي عندها فشي حالات اثر نفسي مدمر على اللي تعرض ليها، ماشي ديما فكرة مزيانة. خاص تفكير فطرق اخرى.
حالات السطو والشفرة كتكون فالمعاريف فالمسيرة فراسين فگوتيي فبورگون. فاحياء مماثلة فالرباط يستحيل يوقع فيها هاد الشي. يستحيل تلقى شي بنت او ولد تخطف ليها صاكها او تلفونها، فاحياء حسان واكدال والرياض فالرباط. حتى لا وقع كيطيح مول الفعلة بسرعة كبيرة. موظف البنكة قال للرباطية اللي تگريسات فكازا باللي من الاحسن تمشي عند بوليس الرباط راهم يقدرو يجيبو ليها تلفوناتها. يعني حتى المواطنين كيشوفو الفرق.
كيفاش عندنا لخطيف فكازا وفشي مدن اخرى وما كاينش فمدن مليونية بحال القاهرة. ناس الامن كيقولو باللي التشريع خاصو يتغير باش يسمح لرجال الامن يتبعو صحاب لماطر اللي كيخطفو الصيكان. دابا ايلى طاردوه ووقعات ليه شي حاجة غاديين يتابعو قضائيا وكيقولو حالة ديال شي جوج بوليس تبعو شفار وطاح ومات وتحاكمو ودوزو الحبس.
هادي حجة ما شاداش. ف16 ماي الاخير فاليوم الوطني للامن، قدمات الادارة العامة واحد الطونوبيلة مجهزة مزيان وعندها قدرة تتعرف على هوية اشخاص كيشكلو خطر. اي كدور وسط لمدينة وكتساعد على التعرف على هوية مجرمين او ارهابيين. اي كاينة وسائل اخرى تسهل عملية الوصول الى هاد الاشخاص اللي رجعو الشارع العام خطر. بنهار او بالليل.
لبنات اللي تشفرو بالخطيف هادي 15 يوم وعاودنا قصتهم، اليوم ما يقدروش يخرجو يتمشاو بوحدهم. اما تهز صاك ودير فيه اغراضها فغا نسى. مادام ما تشدش مول الفعلة، اي موطور داز من حداها ولى مشروع شفار خطاف.
ولكن علاش فكازا واشهر احياءها كاين هاد الشي وفالرباط اللا. السبب بسيط. كازا خاصها زلزال كبير فالامن. توظيف جديد لكاع دوك الكفاءات المزيانة باش تكون بحال بوليس الرباط فعالة.
الشارع العام فكازا خاصو يرجع ديال كاع سكان كازا. يعني مساهمة بيضاوا فهاد الشي راها حاسمة. المساهمة كتكون بمساعدة الاجهزة الامنية، بالتحسيس. بالتبليغ. راه موضوع ديال كل مواطن. خاصنا شارع آمن….. ثم كازا فيها كاميرات سوا فالشارع سوا فالفنادق والمحلات. فحالة الشفرة ديال الرباطية راها كانت قدام اوطيل. قدام واحد كيدير السيكوريتي ديال هاداك لوطيل. واش كان شايف الشفار اللي كان جاي انتيردي ولااللا. ما عرفناش. اللي اكيد انو شافو وتحقق من وجهو مزيان مزيان وعطى اوصافو للبوليس ولكن بعد 15 يوم مازال ما وصلوش ليه. شحال من وحدة غادية تكون تعرضات للشفرة على يدو. اكيد ماشي هي اللخرة.
خاص حلول لهاد الظاهرة. ما خاصناش نتقبلوها ونتعايشو معاها. عندنا فالمغرب باش تتقلص بزاف حتى تمشي. المشرع عندو دور. راه اللي كيشفر بموطور خاصو يتعاملو معاه قانونيا بحال مجرم نيتو القتل. نيتو الحاق الاذى بالضحية.
