كود – وجدة //

قال فوزي لقجع، عضو المكتب السياسي ديال حزب الأصالة والمعاصرة، بلي وجدة خاصها ترجع تاخد البلاصة اللي كتستاهل كـ«عاصمة الشرق» وقاطرة أساسية لتنمية الجهة، بالنظر لتاريخها والكفاءات اللي خرجات منها.

وفلقاء حزبي تنظم اليوم الأربعاء فمدينة وجدة، هضر لقجع على عدد من المشاكل اللي كتعيشها المدينة، خصوصاً النقل الحضري، وقال بلي الوضع الحالي ديال الطوبيسات ما كيتناسبش مع مدينة بحال وجدة.

وتطرق حتى لوضعية الشباب، وشدد على ضرورة فتح فرص أكبر قدامهم فالشغل والاستثمار وإنشاء المقاولات الصغيرة والمتوسطة، باش يقدرو يبنيو مستقبلهم فالجهة.

وفقطاع الصحة، اعتبر لقجع أن الجهة ما خاصهاش تبقى مرتبطة بشكل كبير بالمركز الاستشفائي الجامعي فوجدة، خصوصاً مع ضعف العرض الصحي فعدد من أقاليم الشرق، ودعا لتقوية البنيات والخدمات الصحية وتقريب العلاج من المواطنين.

لقجع هضر حتى على مولودية وجدة وتاريخ الكرة فالمدينة، و استحضار أسماء لاعبين ساهمو فصناعة الذاكرة الرياضية الوطنية، ودعا لتقوية الجهود باش يرجع الفريق الوجدي لبلاصتو .

وفالشق السياسي، قال بلي حزب الأصالة والمعاصرة كيقدم تصور للمستقبل حتى لـ2031، وكيعتبر أن اقتراع 23 شتنبر غادي يحدد شكون غادي يسير الشأن العام فالسنوات الجاية .

وبالنسبة للبرنامج، أكد لقجع أن «البام» اختار يركز على مشاكل مباشرة كغلاء المعيشة والقدرة الشرائيةً، ومن بين المقترحات اللي طرحها تحسين مداخيل المتقاعدين، وتخفيف كلفة فواتير الضو على الأسر محدودة الاستهلاك، وتخفيف الضريبة على الدخل بالنسبة للأجراء، و محاربة الوسطاء اللي كيطلعو أثمنة المواد بين المنتج والمستهلك.

وحط لقجع الشباب فمقدمة الأولويات، من المدرسة والتكوين، حتى للشغل والسكن ودعم المبادرات والمقاولات.، كما شدد على ضرورة إصلاح الصحة والتعليم، وإرجاع المدرسة العمومية لدورها فالتكوين وغرس القيم وتأهيل الشباب لسوق الشغل.

وفالأخير ، قال لقجع بلي «البام» ما سبقش ليه ساگ الحكومة، ودعا المواطنين يعطيوه الفرصة ويحاسبوه من بعد على شنو قدر ينفذ من البرنامج ديالو، وأكد أن الهدف هو تغيير المسار فعدد من القطاعات وإعطاء وجدة والجهة البلاصة اللي كتستاهل.