كود سبور//

وجه فوزي لقجع رئيس الجامعة الملكية المغربية لكرة القدم، ميساج قوي للاعبين المنتخب الوطني المغربي لاقل من 20 عام، بعدما خسرو فينال كاس افريقيا U20 مع جنوب إفريقيا.

وقال فوزي لقجع خلال استقبال المنتخب المغربي بصرامة: “غانهضر معكم كمغربي شغوف بالكورة يعني بشنو كايقولو المغاربة وانا واحد منهم، اولا ما يمكنش ما نباركوش لكم التأهل لكاس العالم وهذا الشي مهم ومهم بزاف تحضرو لكاس العالم فهاد الفئة السنية، ومبروك عليكم التأهل”.

وكمل لقجع: “كنتو قراب فشي ماتشات من داكشي اللي باغي الجمهور وفشي ماتشات كنتو بعاد، وهادو حقائق وخاصنا نقولو الحقيقة ونتعلمو نقولو الحقيقة إلى بغينا نزيدو للقدام، والى بغينا نكونو منتخب كبير فالكورة راه قلتها لكم شحال من مرة وقبل ما تمشيو، وشرحت لكم ان التتويج بمسابقة راه مكون وداخل فالتكوين ديالكم، اتفقو معيا الاطر ولا ما اتفقوش أنا هادي قناعتي وقلتها لهم فالاجتماعات، حيث الروح اللي عند الفائز ماشي هي الروح اللي عند اللي كايبرر الخسارة”.

واضاف لقجع: “راه ما يمكنش واحد اللي طلع غير فالفشل فحياتو فالفئات السنية ما يمكنش يولي فائز ملي يطلع للسينيور، والعكس صحيح هاداك اللي طلع فالرباح ما يمكنش قبل بالخسران من بعد، هذا الشي راه داخل فالتكوين وهذا الشي علاش كنأكد أننا ملي نلعبو مباريات ودية ولا المسابقات الودية ولا الكاف ولا المونديال راه توجور خاص تكون عندنا الجاهزية وكانخاطب الثقافة اللي كاينة فالعقول ماشي كانخاطب الرجلين يماركيو بيت ويساليو لا”.

وزاد لقجع وهو كايأكد: “أنا الكورة كانعرف شنو هي كاتلعب على التفاصيل والندم وكون الفرص تماركاو كون قتلنا الماتش، ولكن هاد لوكان أنا ما عنديش، وملي كايصفر الحكم هذا الشي كايولي من الماضي فالكورة، يعني هذا الاستعداد ماشي خاصنا نديروه حتى نمشيو نلعبو الكورة او الماتش او ندير التجمع لا لا هادي راه ثقافة والى بغيتيها تكون عندك فلاكوب ديمون خاصك من دابا تقول اسي أنا لاكوب ديموند عندي فهاداك التاريخ خاصني فيزيكمون نكون مزيان ومونطالمون نكون مزيان ومركز وفأحسن الظروف باش نعطي احسن ما عندي هذا الشي ما عنديش”.