گود سبور//

أكد فوزي لقجع رئيس الجامعة الملكية المغربية لكرة القدم، ان المنتخب الوطني المغربي غايدخل كاس افريقيا 2025 فالمغرب، باش يربح اللقب وان هذا طموح مشروع، وأكد ايضا ان المنتخب المغربي غايمشي لكاس العالم 2026 باش يحقق انجاز احسن من كوب دي موند 2022، وما غايبقاش يتسنى حتى لمونديال 2030.

وهضر فوزي لقجع فحوار مع جريدة “ليكيب” الفرنسية، وقال: “حنا متصدرين إفريقيا هادي عامين وحنا 12 عالميا، وعندنا منتخب فيها مواهب بمستوى كبير وبقيادة كابيتان اللي كاتعرفوه مزيان اشرف حكيمي، وقادرين نمشيو بعيد، وحنا باغيين نربحو هذا اللقب بعد اللقب الاول اللي كان عام 1976، وهذا ماشي حلم ولكن هذا طموح مشروع”.

وديما بخصوص اهداف المنتخب المغربي للتتويج بالألقاب، رد فوزي لقجع على سؤال “وكاس العالم 2030 عندكم فالدار واش كاتفكرو فيها؟”.. جاوب رئيس الجامعة الملكية المغربية لكرة القدم وقال: “تحقيق انجاز احسن من مونديال قطر (انجاز دومي فينال كوب دي موند 2022)، راه ديجا داخل فالهدف ديالنا لمونديال 2026، وما غانبقاوش نتسناو حتى لعام 2030 باش نجربو نحققوه.

وكمل فوزي لقجع وقال: “نديرو واحد التقييم موضوعي: من ورا مونديال قطر، تطور المنتخب الوطني المغربي من ناحية جودة اللاعبين والخبرة ديالهم مع أنديتهم، والقدرة ديالهم على التعامل مع الضغوطات فالبطولات الكبيرة، وهذا الشي غايخلي ليكيب ناسيونال ترفع من سقف الطموحات، راه حكيمي لعب مع باريس سان جرمان فينال دوري أبطال أوروبا، ومزراوي لعب مانشستر يونايتد فينال اليوروبا ليگ، والزلزولي لعب فينال الكونفروس ليگ مع ريال بيتيس”.