كود الرباط//

قال فوزي لقجع الوزير المنتدب المكلف بالميزانية، بلي المغاربة لي حطو فلوسهم فالأبناك بالتسوية الضريبية، معندهمش علاش يخافو.

وشدد لقجع، اليوم بمجلس النواب، بلي التسوية الضريبية الطوعية لي دارو المغاربة تؤكد ثقتهم في الحكومة وفبلادهم، مشيرا بلي “دبا الناس لي حطو الفلوس مخرجوهاش..وهم احرار في اموالهم”.

وبخصوص تفعيل التسوية الضريبية قبل ما تم 2024، أفاد لقجع بأن النفقات المصرحة مكنت من حصيلة تجاوزت 127 مليار درهم، موزعة بين 77 مليار درهم تم تحقيقها عبر التصريحات البنكية و48 مليار من التصريحات المباشرة من المديرية العامة للضرائب و2 مليار درهم من الخارج.

وأكد لقجع على أهمية التسوية الضريبية والتي تعزز تساهم في تعزيز الثقة بين الملزمين والإدارة الضريبية.

وشدد لقجع بأنه يجدد الالتزام أمام النواب البرلمانيين بأن مغاديش تقاس فلوس هاد المواطنين لي ثاقو البلاد.

كلام لقجع واضح وفيه مساج سياسي لنزار بركة امين عام حزب الاستقلال لي قال بلي كاينا ازمة ثقة فالمؤسسات وانحسار سياسي وازمة اقتصادية. لقجع كيقول الثقة كاينا والتسوية الضريبية دليل قوي.