كود سبور//

شرح فوزي لقجع رئيس الجامعة الملكية المغربية لكرة القدم والرئيس السابق لنهضة بركان، العلاقة ديالو بالأخير، واكد ان داكشي اللي كيربطو بالنهضة كبر بزاف من الكورة ونتائج فريق ولكن عندو ارتباط بمدينة بركان فين تزاد وكبر وفين كاينين والديه، ووضح أن الرجاء والوداد الرياضي هما أهرام الكرة المغربية إلى جانب الجيش الملكي، وكيتعامل معهم بالمساواة، وفرق صغيرة بحال نهضة بركان كتدير بلاصتها باش فالمستقبل حتى هي تكون من أهرام الكورة.

وفحوار دارو فوزي لقجع مع قناة On Time Sports المصرية، هضر وقال: “علاقتي بنهضة بركان، هي علاقة البشر بالمدن اللي تزادو وكبرو فيها، اما مدينة بركان تزاديت فيها وإلى حدود الآن كيعيشو فيها والديا، وفينما كتجيني الفرصة باش نزورهم ما كنترددش وبالتالي كنزور مدينة بركان وعلاقتي ببركان وعلاقة اي شخص بالمدينة اللي تزاد فيها فوق الكورة هي علاقة تاريخيّة استمرّت لأجيال، أنا أمثل جيل ووالدايا كيمثلو جيل”.

وكمل رئيس الجامعة الملكية المغربية لكرة القدم، ووضح: “نادي نهضة بركان كان عندي الفرصة نتبعو ملي كنت صغير ولعبت فالفئات الصغيرة ديالو وبالتالي العلاقة كبر من تحقيق نتائج وهي علاقة حب ونشأة وبحال گاع الشباب فكل المدن كيلقاو وجدانهم وهويتهم فهاد الفرق والناس كتتوحد حول فرق مدنها، وملي كيتعلق الأمر بالمنتخبات الوطنية كلشي كيتوحد عليها، وكنتمنى لنهضة بركان النجاح كيفما كنتمناه لكل الفرق المغربية ولكل الفرق العالمية ان تساهم فتطوير كرة القدم وخدمة الشباب”.

وجوابا على سؤال: “كاين اللي قال انه فالسنوات الأخيرة انك كتبغي الوداد وكتشجعهم”، جاوب فوزي لقجع وقال : “تعاملي مع الفرق المغربية على المستوى المؤسساتي وعلاقتي بالأحداث الكروية اللي كانت فيها الفرق المغربية كان ديما على قدر المساواة وآخر فريق استقبلناه هنا فمركز محمد السادس كان هو الرجاء الرياضي ملي لعب البطولة العربية ولدرجة أنني اجتمعت معهم، بالعكس كنت من المساهمين فبلورة المشروع الملكي لأكاديمية الرجاء  وهي مفخرة اليوم لنادي الرجاء وكنقول ان الرجاء والوداد ما  محتاجينش لمساندة ومساعدة رئيس الجامعة الملكية المغربية لكرة القدم، وتاريخهم وجماهيرهم أغنى بكثير من اي حاجة يقدر يقدمها لهم رئيس اتحاد.. هما أهرام الكرة المغربية ومعهم الجيش الملكي وثم كاين المغرب الفاسي ومولودية وجدة، وجايا اندية صغيرة اللي كدير بلاصتها بحال نهضة بركان اللي قدر يرح فالسنوات الأخيرة كاس العرش وكأس الكونفدرالية ومع الوقت وبعد عشرات السنوات حتى هي تولي هرم فالكورة”.