گود سبور//

حط فوزي لقجع رئيس الجامعة الملكية المغربية لكرة القدم، الصبع ديالو على الخلل ديال الكورة الوطنية، والي كاين فتكوين اللاعبين فالاندية الوطني، واللي ما بقاتش قادرة تعطي لاعبين اللي قدر مستواهم يخليهم يمشيى يحترفو فأوروبا ويلعبو فالمنتخب المغربي الأول، وكان صارم فالخطاب ديالو فلقاء فمركب محمد السادس لكرة القدم، مع العصبة الوطني لكرة القدم برئاسة عبد السلام بلقشور ومدربين مغاربة.

فوزي لقجع ما راضيش على المستوى ديال الفرق الوطنية والبطولة الاحترافية والتكوين فالاندية اللي ما قادرينش يعطيو لاعبين عندهم مستوى تنافسي قوي، بالمقاربة مع التطور اللي كاتعرفو المنتخبات الوطنية، واكد لرئيس العصبة والمدربين المغاربة فاللقاء، ان الأمور ما يمكنش تبقى غاديا بهاد الفوارق ما بين المنتخبات الوطنية المغربية وما بين الكورة المغربية (البطولة والأندية).

وقال لقجع بصرامة راه غدا إلى جا عندو فتحي جمال المدير التيقني الوطني د الجامعة وقاليه غادي نمشيو نلعبو كاس العالم U17، ونتمناو غير نتأهلو راه غادي يجاوبو ويقوليه ما يمكنش راه اللغة اللي كانهضرو بها راها لغة مختلقة.

وكمل لقجع وقال للحاضرين فهاد اللقاء: “راه المنتخبات الوطنية كاينين والأهداف ديالهم كاينين، والكورة الوطنية كاينة وفيها مشاكل وحنا دابا كانهضرو غير على جانب الكورة (الجانب الرياضي)، وملي يجيو الرؤساء (رؤساء الأندية) خاصهم يشرحو ليا شنو واقع، يشرحو شويا الماركوتينگ كيف دياير واشمن استراتيجية ديال الماركوتينگ كاينة، واشنو هما النتائج ديالها ويكون اختلاف وجهات النظر وهادي هي الحياة”.

وكمل لقجع وقال: “الى كنا كانلعبو وما كانقدروش نوصلو للمستوى الكبير بحال إلى الماكينة ديالنا وقفت، خاصنا نعرفو علاش وكيفاش وفين كاضيعو هاد المواهب والطاقات وعلاش؟ باش نطورو هذا الشي، وإلا غادي يوليو عندنا 2 أنواع د الفوتبول، واحد فوتبول ديال المنتخبات الوطنية وواحد والفوتبال آخر، والى كان هذا هو المصير واتفقنا عليه نفرقو بيناتهم مزيان بشي حيط باش ما يبقاش شي يختلط مع شي”.