كود سبور//

اكد فوزي لقجع رئيس الجامعة الملكية المغربية لكرة القدم، ان الهدف الجاي ديال المنتخب الوطني المغربي للفوتسال بعدما ربح كاس افريقيا للمرة الثالثة على التوالي، هو يربح كاس العالم فأوزبكستان، وأكد على اللاعبين والمدرب هشام الدكيك ان الملك محمد السادس والجماهير العربية كيتسناوهم يخرجو ابطال من المونديال الجاي.

واستقبل  فوزي لقجع رئيس الجامعة الملكية المغربية لكرة القدم فحفل للمنتخب الوطني المغربي للفوتسال فمركز محمد السادس لكرة القدم، بمناسبة التتويج بكاس أفريقيا للمرة الثالثة على التوالي، وقال لهم فكلمة له: “ديما كنقول انكم المنتخب النموذجي اللي انخرط بشكل تام فخارطة الطريق والاستراتيجية الرياضية اللي وصع أسسها الملك محمد السادس، واليوم مركب محمد السادس اللي ديما كتدربو فيه فظروف احترافية هو تجسيد لاحد ركائز هاد النظرة الاستراتيجية ديال الملك محمد السادس، وكنلمس يوميا وعن قرب العمل الجبار والعطاء والانخراط عمل دؤوب كديروه يوميا، وكتدخمو يوميا وباستمرار، والنتائج اللي كتحققو هي تتويج لهاد العمل، وحنا اليوم فخورين ومحظوظين بتوفر مملكتنا بفضل استراتسجة الملك محمد السادس على مركز محمد السادس لكرة القدم اللي صبح محطة تنويه، ماشي غير فالقارة الافريقية ولكن من گل الجهار المسؤولة على كرة القدم عالميا”.

وكمل فوزي لقجع وقال: “الفريق الوطني اللي كتمثلوه، الحاضر هو هذا، ومن حقكم وحقنا نفرحو بما يليق بالتتويج الأفريقي الثالث على التوالي فالقارة الأفريقية ولكن التحديات المستقبلية واضحة هي وانتظارات الجماهير المغربية اللي كانت مثالية لمساندتكن، وكيف شفتو قاعة مولاي عبد الله كانت ديما عامرة  لتشجيعكم، وكون كان ثمن تذاكر الفينال مدوبل 4 مرات كانت غتكون عامرة كلها”.

ووجه فوزي لقجع ميساج واضح للاعبين وقالهم”: “هاد الجماهير وهي عبارة جات فبرقية التهنئة اللي بعث لكم  سيدنا كتفرض علينا نرفعو التحدي فكاس العالم، وانا هذا التحدي كنت قلتو منذ سنوات، وفهادك الوقت كان اللي اعتبر هاد الطموح  ديال الفوز بكاس العالم كان طموحا علينا فيه السقف بزاف وما يناسبش الواقع، وملي داز الوقت لاحظت ان هاد القناعة ترسخت عندكم كاملين وغتزيد تترسخ إذا وكملتو الخدمة وخاصم تزيدو تخدمو لتجاوز الظروف الموضوعية الصعبة اللي حاطت الإعداد لكوب دافريك، ودابا التحديات اللي انخرطتو فيها خليتو الجماهير المغربية وسيدنا فمقدمتهم، يتناظرو منكم فكاس العالم نمشيو لأوزباكستان باش نخرجو ابطال من هاد الكاس وراكم قادريين على هذا الشي”.