كود القنيطرة//

الساكنة ديال جماعة بحارة أولاد عياد فإقليم القنيطرة، فاقت اليوم فالصباح، على صدمة كبيرة بعدما لقاو راجل مجهول الهوية ميت، وجثة هامدة فدوار ولاد مصباح/ دوار مغيطن نواحي مولاي بوسلهام. هاد الجثة كان لقاها واحد واحد من السكان كان دايز من المنطقة، وخبر مباشرة السلطات.

وفور ما وصلهم الخبر، جات فالبلاصة السلطة المحلية والبومبية و الجدارمية، ومعاهم العناصر ديال مركز التشخيص الجهوي. وتم فتح تحقيق فظروف وملابسات هاد القضية، مع نقل الجثة ديال الهالك ل”لامورݣ” باش يواصلو البحث تحت إشراف النيابة العامة المختصة، وكيتم حاليا السعي لمعرفة هوية الفقيد.

.