وكالات//

بوليس المكسيك لقاو ملكة جمال كمال الأجسام لوز ماريا باريرا أغاتون ميتة فبيسين ديال واحد لوطيل قرب كانكون فالمكسيك.

وهادشي حسب الجريدة “ميرور”، لوز ماريا اللي كانت عندها 32 عام، كانت فواحد العطلة مع العائلة، وكانت كتدوي مع صحابها وعائلتها حدا البيسين، حتى تناص الليل ومشا كلشي ينعس، وخلاوها بوحدها.

منين لاحظو أنها ما بانتش، بداو يقلبو عليها حتى لقاوها ميتة فقاعة البيسين. وحتى منين جات فرق الإنقاذ بسرعة، مقدروش ينقذوها.

النيابة ديال المنطقة بدات أونكيط أولي فالحادث، ولكن كاينين تقارير كيقولو باللي لوز ماريا كانت مهددة مؤخراً، بحيث تعلّقات واحد اللافتة قدام لاصال دالجيم ديالها فميريدا سيمانة قبل ما تموت، ولكن هي حيداتها وقطعاتها وما قالت والو للبوليس. وكان عندها مشكل مشابه فـ2017 هي وراجلها السابق اللي كان وكيل عام ديال الدولة فداك الوقت.