وكالات //

لقات السلطات البريطانية روزي روش، اللي هي بنت عمة الأمير هاري والأمير ويليام، ميتة فدار العائلة ديالها فمقاطعة ويلتشير، وعندها 20 عام. ولقاو حداها سلاح ناري، حسب ما ذكرت جريدة “ذا صن”.

الجريدة قالت إن الأم والأخت ديالها هما اللي اكتشفوها ميتة، وهي كانت كتوجد راسها باش تسافر فإجازة مع صحابها. الوفاة وقعات نهار الإثنين 14 يوليوز.

الطبيب الشرعي ديال ويلتشير، غرانت ديفيز، أكّد أن الشرطة ما كتشكّش أن الحادث فيه شي شبهة إجرامية أو تدخل شي طرف خارجي، ودارو تحقيق اللي غادي يتكمّل فـ25 أكتوبر الجاي.

روزي كانت كتقرا الأدب الإنجليزي فجامعة دورهام، وعائلتها كتبت فالنعي ديالها فـ”يوركشاير بوست” أنها كانت “بنت وأخت وحفيدة محبوبة”. وقالو حتى أن الجنازة ديالها غادي تكون خاصة، وغادي يديرو ليها حفل تأبيني من بعد.

وصرّحات متحدثة باسم العائلة المالكة للجريدة أن “روزي غادي توحشها الجميع بزاف”.