كود هناء ابو علي ///

علمت “كود” ان مديرية الموارد البشرية بادارة قناة “فرانس 24” رسلات رسائل لصحافيين مغاربة باش تشوفهم. هاد الشي وفق ما توصلت اليه “كود” عندو علاقة باخبارهم بالتخلي عليهم.

طبعا هاد الصحافيين غير مقدمة باش يجريو على صحافيين اخرين القاسم المشترك بيناتهم هو انهم مغاربة “دابا كاين واحد الهيمنة جزائرية على هاد القناة” يشرح مصدر ل”كود”. لخبار كانت دارت ايام بدا ماكرون رئيس فرانسا سياسة تقاربو مع الجزائر وجا بعدها زيارة ليها ولقاء تبون رئيسها يضيف مصدر “كود”.

كانت “ماكريب انتليجانس” هدرات على هاد المخطط الجزائري. هاد المخطط ما بداش مع “فرانس 24”. راه بدا قبل. اول واحد خلصو هو الصحافي المغربي الفرنسي لمباركي اللي جرات عليه “بي اف ام تي ڤي” قبل اشهر. ظاهريا قالو باللي دوز خبارات بلا خبار القناة وباللي كاين شركة علاقات عامة اسرائيلية معاها فرانساويين خدامة لصالح صورة دول بحال السودان وجندات هاد الصحافي.

المشكلة ماشي هادي. لمباركي كان فشي اخبار قدمها بالليل وظف عبارة “مغربية” فتقديمو لموضوع على الصحرا. طبعا تحركات الجزائر ومخابراتها وطيرو الصحافي.

هاد المخابرات ما خداماش غير ففرانسا. شفنا اش دارو ناصر عبد الصمد ديال “الجزيرة”. هنا بانت خدمة المخابرات الجزائرية وبان كيفاش كتحكم فدولة قطر. صحافي كتب فصفحتو الشخصية فوسائل التواصل الاجتماعي موقف شخصي ما كيلزم الا شخصو. دافع على راسو على بلادو كيف كيبان ليه. النتيجة. مخابرات الجزائر ومعاها دولة قطر جراو عليه.

فنفس الدولة اللي ماتو فيها الاف المهاجرين باش كانو كيبنيو تيرانات للمونديال كيف قالت منظمات حقوقية٬ مخلية صحافيين جزائريين كيسبو يوميا المغرب وما عمرهم هدرو معاهم. دابا “الجزيرة” ولات بوق للرئيس الجزائري. للجينرالات. كيجيبوه وشكون كيستاضفو؟ خديجة بن قنة٬ صحافية جزائرية ممثلة الاسلام السياسي ومهمتها الرئيسية اليوم هو الهجوم على المغرب.

هاد الشي كولو وجدو ليه كثر. عقلتو على زيارة تبون لقطر. تلاقى مع صحافيين خدامين مع النظام الجزائري ومنهم هاد بنقنة وحفيظ الدراجي. كان لقاء اخر ما بانش فالتصاور. دارو جينرالات الجزائر مع هاد الصحافيين داخل وخارج لبلاد.

دابا بدعم كبير من فرانسا ومن قطر وبجوجهم كيقدمو ريوسهم اصدقاء المغرب باش كتشعل الكاميرا٬ خدامة المخابرات الجزائرية كتجري على الصخافيين لمغاربة من قنوات كثيرة. المشروع يالله بدا. دابا وصلنا ل2 رسميا و2 فالطريق واكثر من 10 جايين فالطريق خاصة ففرانسا