كود هناء ابو علي ///

قناة “فرانس 24″ بالعربية خدامة مع شركة لصحافية كتخدم فهاد القناة. غريبة هادي ياك. وراه بصاج. هاد الصحافية اللي كانت بمستوى قل من المتوسط باش كانت ف”لوماتان” ولات من صحابات المشاريع والشركات. طبعا القناة الفرنسية كتسوق ليها مشاريعها.

دارت شركة ديالها فالمغرب. طلقات بيه موقع رياضي خاص بالرياضة النسوية عندو شراكة مع مؤسسة تابعة للدولة المغربية وكيرأس مجلسها الاداري وزير الشبيبة والرياضة ومن بعد دارت فيلم وثائقي على منتخب الكورة النسوية. هي ما عندها علاقة بالمغرب اصلا حتى يكون عندها علاقة بالرياضة هنا.

لكن باش طلقات هاد الشي واستافدات من هاد المشاريع بوحدها دون غيرها٬ ولات كتوظف القناة لتسويق لعابات المنتخب.

البارح 10 اكتوبر 2022 جابت بلا حيا بلا حشمة عميدة المنتخب المغربي لكرة القدم النسائية غزلان الشباك باش تعاود ليها هاداك الشي اللي عاوداتو فالفيلم الوثائقي اللي كان كوموند ماشي ابداع. الاستضافة كانت فبرنامج “ضيف ومسيرة” اللي كتقدمو.

هادو هما لفرانسيس اللي كيعطيونا دروس فالصحافة. هادي هي قناة 24 اللي كيكعاو منها لمغاربة بعض المرات. كلشي مخلط وشي داخل فشي. مشات الصحافة مع هاد العينة. دير حوار مع الامير هشام او هشام العلوي. تسالي مع عميدة المنتخب المغربي لكرة القدم النسائية