گود سبور//

كاين لغلا فمدينة نيوجيرسي الميريكانية، فين غادي يلعب المنتخب الوطني المغربي أول ماتش له فمونديال 2026، واللي غادي يكون يوم 13 يونيو 2026، ضد منتخب البرازيل، وحسب جريدة The Athletic الميريكانية، فالجماهير اللي باغيين يحضرو لكأس العالم فميريكان ويشجعو منتخباتهم غادي تقامو عليهم لوطيلات وطرونسبور العمومي فميريكان غاليين.

وكشفت الجريدة الميريكانية، هيئة النقل فنيوجيرسي (NJ Transit) ناويين يفرضو رسوم كاتزيد على 100 دولار أمريكي على تذاكر الترانات ذهابا وإيابا من محطة بنسلفانيا فنيويورك لتيران ميتلايف فين غادي يلعب المغرب ضد البرازيل، وهذا الشي بالنسبة للي باغيين يحضرو ماتشات كأس العالم لكرة القدم، يعني الثمين زايد كثر من 7 المرات على الثمن العادي اللي كايكون ديما واللي هو 12.90 دولار.

هاد التكاليف المالية الكبيرة تقدر تأثر على الحضور د الجمهور فمونديال ميريكان وكندا والمكسيك الصيف الجاي، وتخلي الإقبال على الماتشات د المسابقة ضعيف، وتحط الاتحاد الدولي لكرة القدم فموقف صعيب بزاف من ناحية شعبية اللعبة، وقدرة الجميع على الوصول لها، خصوصا وأن الفيفا ديما كانت كاتدافع على شعبية اللعبة عند شعوب العالم كامل، وكانت هادي هي قوة الكورة على باقي الرياضات.

للإشارة فالنسخ الأخيرة الماضية من كاس العالم، فروسيا وقطر كانت كاتعرف تسهيلات من ناحية الأثمنة خصوصا فوسائل النقل العمومي، بالنسبة للجماهير اللي كانت عندها تذاكر الماتشات واللي كانت كاتكون عندها عروض وتخفيضات، وهذا الشي ما غاديش يكون فالمونديال الجاي فميريكان وكندا والمكسيك حسب الأصداء اللي كاتسبق كاس العالم 2026.