كود سعيد الشاوي كود ////

عقلتو على الفيلا الشهيرة اللي كانت فتقاطع شارعي انفا مع الزرقطوني فكازا؟ ڤيلا “موفيليي”. تقرر هدمها فيونيو 2020 اي هادي 5 سنين. كانت فضيحة باش تباعت. فضيحة باش تهدمات. بدات اشغال بناء اوطيل “ماريوت” واليوم تقرر يولي “مرفق عمومي محلي”، حسب وثيقة توصلات بيها “كود” من المعارضة. هاد الوثيقة هي مراسلة بتاريخ 29 ماي 2025 دارها والي الدار البيضاء لرئيسة مجلس جماعة سيدي بليوط كازا بخصوص “عقد دورة استثنائية” لهاد المجلس.

فجدول هاد الدورة “الدراسة والتصويت على نزع الملكية من اجل المصلحة العامة للقطعة الارضية…. مساحتها 551 متر مربع” وغادية تحول ل”مرفق عمومي محلي يساهم في توفير خدمات للقرب لفائدة ساكنة المنطقة”.

للتذكير ديك الڤيلا راها كانت ثرات بيضاوا. مسجلة فقوائم المباني اللي خاص المحافظة عليها. بل وزارة الداخلية فشهر يوليوز 2020 خرجات بيان كتقول باللي عفات عامل عمالة مقاطعات انفا رشيد عفيرات ل””سوء تدبيره لملف المحافظة على التراث التاريخي والمعماري بمدينة الدار البيضاء “.

طبعا هاد الشي كذوب وقلناها ف”كود” فوقتها. السبب ان التعمير التابع للعمالة عندو رأي استشاري فقط واللي كيتكلف بهاد الشي هو مدير الوكالة الحضرية ديال كازا. حنا كنعرفو بان هاد الوكالة الحضرية بوحدها فالمغرب اللي ما تابعاش لوزارة السكنى والتعمير بل لوزارة الداخلية ومديرها عامل وما كيسمع الا لوزير الداخلية.

دابا بعد هدمها لحقات شي لعنة هاد الارض. تباعت وبدا مولاها كيبني اوطيل. توقف المشروع كثر من مرة. دابا خرجات هاد المراسلة.

المشكلة هو واش هاد الشي قانوني. كيفاش كازا كتقضي على معالم كتشكل جزء منها، من بعد يتقرر تاخذ الجماعة هاد الارض وترجعها مرفق عمومي واخا الجماعة يالله فوتات جوج الاراضي وفشارع انفا. كانت دير من واحد منهم “مرفق عمومي محلي”

مصادر من المعارضة فسيدي بليوط قالت ل”كود” باللي هاد لشي راه فضيحة. وتساءل عضو منها ل”كود” “اش هاد التخربيق” موضحا باللي كان مشروع لمستثمر ودابا خداو منو ارضو كيف دارو فاقدم اوطيل فكازا “مرحبا” اللي كاين فشارع الجيش الملكي بالقرب من “روايال المنصور”. واخا هاد الاخير ما نزعوش منو الملكية. ريبوه ورجعوه جردة وقالو للورثة ديالو “الارض راها ديالكم”. كاين شي عبث كثر من هاد الشي” يضيف مصدر “كود”.