كود الرباط//

علمت “كود” بلي قناة العربية تواصلت مجددا مع وزير العدل عبد اللطيف وهبي، بخصوص التصريح المنسوب ليه واللي روجو الإعلام الجزائري وفيه بلي “المغرب كيرحب بالمساعدات الجزائرية” وقابل بها.

العربية خبرات المسؤول المغربي بلي وقع خطأ ف لافيش ديال عاجل واللي كتصايبو شركة خاصة متعاقدة مع قناة العربية، هاد الشركة صايبات أفيش عاجل وفيه بلي المغرب يرحب بالمساعدات الجزائرية.

وقبل ساعات قليلة فقط، قناة العربية صححات الغلط ودارت اليوم تصريح وهبي وفيه “وزير العدل المغربي: نرحب بالمساعدات الدولية لكن بالتنسيق مع وزارة الخارجية”.

خطأ صغير ولكن كانت الكلفة كبيرة خصوصا وأن الجزائر ركبات عليه بدون الرجوع إلى الفيديو الأصلي.

يشار بلي المسؤولين المغاربة عاودو شافو الفيديو ديال المقابلة الإعلامية بين وهبي وقناة العربية وتأكد ليهم بلي داكشي لي روجات الرئاسة الجزائرية كذوب على تصريح وهبي. لعب دراري وصافي.

كيفاش دولة كاملة اعتمدت على “أفيش” فيه تصريح مغلوط ماشي على الصوت والصورة كيفما صرح وزير العدل للعربية.