وكالات//

علنات شركة  Activision، اللي كتنشر سلسلة الألعاب المعروفة Call of Duty، على اتفاقية مع استوديوParamount Pictures باش يديرو فيلم واقعي ضخم مبني على اللعبة، واللي كيستهدف ملايين المعجبين ديالها فالعالم كامل.

من نهار خرجات فـ2003، Call of Duty ولات من أشهر وأنجح الألعاب فالعالم، تباعت منها أكثر من 500 مليون نسخة، وخرجات منها 23 نسخة رئيسية، كل وحدة كتدور فزمن مختلف ومستوحاة من حروب وصراعات حقيقية.

رئيس Paramount، ديفيد إليسون، قال أن هاد المشروع هو “حلم تحقق”، وبأنه لعب اللعبة لساعات طوال، وكيعتبر تحويلها لفيلم سينمائي “شرف ومسؤولية كبيرة”.

مازال ما علنوش على تفاصيل القصة ولا شكون غيكون فالفيلم، ولكن هاد المشروع كينضاف لسلسلة ديال ألعاب ولات أفلام، بحال Legend of Zelda وElden Ring وThe Sims.

الإعلان جا بعد النجاح الكبير اللي داروه أفلام مقتبسة من ألعاب، بحال Super Mario Bros Movie فـ2023، وفيلمMinecraft اللي خرج هاد العام، وزيد عليهم المسلسلات اللي دارو البوز بحال The Last of Us وFallout.