كود -مكناس//

لقّى فريق ديال علماء الآثار لوحة ديال لعبة قديمة بزاف فالموقع الأثري ديال وليلي، اللي معروف حتى باسم فولوبيليس، هاد اللوحة عندها تقريباً 1200 عام، وكتكشف لينا كيفاش كانو المغاربة كيدوزو وقت الفراغ ديالهم وكيعيشو الأجواء الاجتماعية ديال داك الوقت.

هاد الاكتشاف تذكر فدراسة علمية تنشرات فشهر يونيو فمجلة Libyan Studies، وشاركو فيها باحثين من جامعات بريطانية ومن المعهد الوطني لعلوم الآثار والتراث بالمغرب.

اللوحة كانت محفورة فوق درجة كتوصّل لحوض ديال الماء البارد وسط حمّام من العصر الإدريسي (لي يقدرو يكونو لقاوه أصلا فوليلي) وكيظنّو الباحثين أن هاد الحمّام تبنى ما بين القرن 8 والقرن 9، وبقا مستعمل حتى القرن 10 او 11.

اللوحة فيها ثلاثة صفوف ديال الحفريات الصغار، وفيهم على الأقل 13 حفرة، وكانت مرتبة بطريقة كتسمح لجوج ديال الناس يجلسو مقابلين لبعضياتهم ويلعبو .

وكيبان من لبلاصة اللي كانت فيه، وسط الحمّام، أن اللعب كان حاجة عادية ومقبولة، يعني الحمّام ما كانش غير باش يغسلو، ولكن حتى باش يلعبو ويترولاكساو.

العلماء قالو بلي هاد اللوحة كانت كتستعمل فواحد اللعبة استراتيجية معروفة باسم tāb””، واللي مازال كيتلعب نوع منها فبعض مناطق شمال إفريقيا تحت اسم “السيڭ”، وإلا تأكد هاد الشي، غادي تكون هادي أقدم دليل أثري معروف على هاد اللعبة فالمغرب والمنطقة.