كود سبور//

صبحت الشكوك كتحوم حول إمكانية تواجد الدولي المغربي جواد ياميق فلائحة المنتخب الوطني المغربي اللي غادي تشارك فكأس العالم المقبلة فقطر، حيث غيغيب لمدة مهمة على التيرانات بسبب الإصابة، لينضاف إلى كل من نايف أكرد وطارق تيسودالي، هذا الأخير اللي مؤكد الغياب ديالو على المونديال بشكل نهائي.

وكشف فريق بلد الوليد الإسباني أن اللعاب ديالو المغربي جواد ياميق عندو إصابة كتفرض عليه يخضع البروتوكول من العلاج والراحة لمدة كتراوح ما بين 3 و4 سيمانات، وهي الإصابة اللي تعرض لها فماتش الويكاند اللي فات ضد فريق خيطافي فالبطولة ديال الصبليون.

وكان جواد ياميق شارك فالمعسكر الماضي ديال المنتخب الوطني المغربي تحت إشراف المدرب وليد الركراكي فالصبلون، وكان احتياطي، لكن الإصابة ديالو مؤخرا كتهدد تواجدو فكأس العالم مع الأسود فحالة غابت عليه التنافسية.

وكيفرض المستجد الجديد ديال جواد ياميق على وليد الركراكي البحث عن بدائل أخرى فالدفاع ديال ليكيب ناسيونال، فانتظار الحسم فجاهزية المدافعين ياميق ونايف أكرد اللي حتى هو كيحاول يرجع بسرعة للتيرانات من بعد ما غاب لأسابيع، بسبب الإصابة ديالو مع فريقو ويستهام الإنجليزي.