كود: مكتب كلميم //

فالكلمة لي لقاها الأمين العام لحزب الإتحاد الإشتراكي فاللقاء التواصلي لي نظمو الحزب بمدينة كلميم، صرح إدريس لشكر بأن الصحراء ليس حكرا على شي حد وخاص كولشي يستفاد منها، وبأن ما تم تنزيله من مشاريع بجهة كلميم بلا فايدة، والدليل بأن وادنون مزال كتتذيل وفالصف الاخير عن باقي جهات المملكة وخاصة في البطالة.

وأضاف لشكر فالكلمة ديالو، بلي مايمكنش أن تكون خمسة ولا ستة العائلات هوما لي حاكمات ومسيطرات على خيرات الصحرا كاملة، والمواطنين كيعانيو فصمت من البطالة وخصوصا فئة الشباب والنساء.

وزاد قال لشكر، بلي اصبح كيستغرب وكيتعجب من التحول لي وقع فالصراع الحزبي لي تتحول لصراع بين خمسة ولا ستة العائلات، وكيف ولي المشهد السياشي كيتحكموا فيه وتحكموا حتى فالبحر وفالبر.

واتم لشكر كلامو بطرح تساؤلات، بأنه كيفاش الدولة مشرفة على الانتخابات ومن بعدها الحكم الذاتي، وحنا عندنا نموذج لا يشجع حتى ساكنة تندوف باش تجي، حيت كاتشوف وكتسمع بالفساد لي كاين فالصحرا، وكتشوف معاناة المواطنين من صراع خمسة ولا ستة العائلات النافذة.

يذكر بلي كلام دريس لشكر، كان خلال اللقاء التواصلي لي تنظم وحضروه مناضلي حزب الوردة بكلميم، تحت شعار” العدالة المجالية ورهانات التنمية”.