لادرتي احصاء وسط الحبس و خديتي ميات مجرم و سولتيهم على مهنة الأم غاتلقى بلي الاغلبية الساحقة ماواتهم ماقارياتش و لا ماخداماتش و لا خدامات غاتلقاهم خدامات فشي خدامي ديال الله يحسن العوان ” صبّانة، فام د ميناج، عندها فرّاشة ديال القزبر فالقنت ديال شي سويقة…” و قليل قليل فين غاتلقى ولد شي طبيبة و لا ولد شي مهندسة مشدود فالحبس (كاين طبعا و لكن قليل)

نسبة النجاح ديال الطفل فاش كايكبر مع أم قارية و موظفة حتى هي أكبر، و لاخديتي ميات مرا موظفة و ميات مرا جالسة فالدار و شفتي شكون ولادهم قراو و مشاو بعيد غاتلقى النسبة الكبيرة عند ولاد الموظفات و هادي حاجة كاينة و باينة و كاتبان بالعين المجردة فالواقع.

انك تتزاد وسط أسرة فيها الأم قارية وواعية و عندها استقلالية مادية ( خدّامة) راه عندك حظوظ اكبر انك تكبر وسط اسرة متوازنة و تاخد الرعاية اللازمة و تلقى لي يوقف معاك و يوريك شنو دّير و يساير معاك المسار الدراسي باش تمشي بعيد حتى تخدم و دير لاباس.

و هانتوما كاتشوفو فالواقع كاتلقى معلم و معلمة كايتزوجو كايولدو كاتلقى ولادهم مهندسين و اطباء، نفس الشيء مهندسة كاتزوج مهندس اكيد ولادهم غايمشيو أبعد منهم و غاتلقاهم عندهم شي ولد مهندس فميريكان فگووكل و لا فأمازون و شي بنت كاتوجد الدوكتورا ديالها فسيول حيت خدات شي منحة ديال التفوق… ديما ولاد العائلات القارية و الامهات الموظفات كايشقو حياتهم بشكل أسهل فالحياة، في حين ولاد ربات البيوت نسبة كبيرة منهم كايلقاو صعوبات باش يلقاو طريق النجاح ، واش واحد كابر مع أم فايتة مدوزة ليزونتروتيان هوا واحد كابر مع ام ماعمرها عرفات الشركات كي دايرة من لداخل ؟ الاولى غاتقدر تفيدك بالتجربة ديالها و الثانية الحاجة الوحيدة لي غاتفيدك بيها هي الدعاء و الزبيب !

داكشي علاش وسط دوك الامهات لي مشاو يحتجوا على الفصل 507 انا متأكدة بلي ماكاينة حتى شي مهندسة و لا شي طبيبة، هادشي ماكايعنيش انه المهندسة ماعمرها غاتولد ليك مجرم و لا ربة البيت بالضرورة ولادها مجرمين، لا يا بوگرن تعلم تقرى و تحل راسك و تفهم، هادشي كايعني انه ولد المهندسة عندو حظوظ اكثر يصوڤي فالحياة و مايطيحش فالاجرام.

و طبعا هادوك لي مشاو يحتجوا انا شخصيا كانشوف بلي خاصهم يتشدو و يمشيو يونسو ولادهم فالحبس بجريمة جديدة سميتها ” المشاركة العاطفية في انتاج مجرم “و لا “عدم القيام بالواجب الأمومي” حيت ماكاينش لي خرج على المغرب قد هادوك ماليات الجلالب لي كاتكون لابسة تزارة ديال الشقا تحت الجلابة كاتنعس بيها و تفيق بيها دايرة فيها السوارت و البزطام د الصرف كل وحدة زكها قد السانياگو بيرنابيو شادة بزطام كبير فيديها و كاتغوت فباب الكوميسارية “ولدي مادار والو آ شيدي” دوك البوحاطيات لي كايطيحو يسخفو فباب الحبس و باب الكوميسارية ووسط المحكمة زعما تصدمات حيت شدو ليها ولدها ! آ نوضي يا هاد البوحاطية نوضي !