كود الحسيمة ///
لازالت الفرقة الوطنية تنبش في خروقات في ميناء الحسيمة على خلفية وفاة محسن فكري. هاد المرة الفرقة الوطنية تصنتات، توضح مصادر “كود”، نهاية الأسبوع الماضي لثلاثة موظفين بمندوبية الصيد البحري بالحسيمة على خلفية اختلالات وصفها مصدر “كود” بالفضائحية.
الموظف الأول لي تصنتو ليه موظف في مصلحة شؤون البحر بمندوبية الصيد البحري في الحسيمة، بعدما لقاو المحققين شي قوارب تم بيعهم لأشخاص آخرين بلا خبار ماليها حيت تعطلو في تجديد رخص الصيد بالمندوبية، ومشاو دارو شكايات وتاحد متسوق ليهم تا جاو الفرقة الوطنية.
كما استمعت الفرقة الوطنية، تقول مصادر “كود”، لموظف آخر مسؤول عن نظام “في إم سي” الخاص بمراقبة القوارب والصيد الجائر والمسافات القانونية المسموح بها، بعد تعطيل هاد الجهاز من لدن ربابنة مراكب الصيد باش يديرو لي بغاو ويصيدو فين بغاو.
الموظف الثالث، تضيف مصادر “كود”، سولوه على الوقود المدعم، بصفته مسؤول عنه بالمندوبية، المحققين لقاو أن ليصانص ديال المدعم ديال الدولة والمخصص الباطوات كيتباع للشركات الكبرى ديال الأشغال ومالين الكاميوات يقلبو فيه البيع، ولقاو أن شي مراكب تاع الصيد كتستهلك ليصانص أكثر مما تبيعه من أسماك، فمثلا لقاو أن بالكو ديال الحوت ضارب 30 مليون ديال ليصانص ويالاه بيع غير 15 مليون سنتيم ديال الحوت. !.
