كود الرباط//

كشف مصطفى لخصم، رئيس جماعة إيموزار كندر، عن تفاصيل الحادثة اللي وقعات لبارح أثناء تدخله في تحرير الملك العمومي من الاحتلال البشع وغير القانوني، موضحا بلي “ماضرب حتى واحد وكاينين فيديوهات كتوثق”.

وقال لخصم في تصريح لـ”كود”: “أول لبارح خرجت لجنة تابعة للبلدية، لمعاينة احتلال الملك العمومي فالشارع، وكيشوفو القهاوي لي خارجين بزاف ومعيقين فاحتلال الملك العمومي بدون رخصة”، مضيفا: “تم تنبيه صحاب المقاهي وعلمناهم بلي غذا غانعاودو نراقبو ولي مطبقش القانون غانحيدو ليه الطبالي والكراسي”.

وأوضح لخصم، بصفته رئيس الشرطة الإدارية، بلي البارح مشا مع اللجنة باش يشوفو المقاهي واش طبقو التوجيهات لي تعطات ليهم، منهم مقاهي لي تقبلو تطبيق القانون وفعلا تهزو ليهم الطوابل والكراسي بشكل عادي باسثتناء مقهى وحدة.

وتابع لخصم لـ”كود”:  “لكن فاش وصلنا لمقهى (تيتانيك) للي معروف كيجلسو فيها الشيوخ والمقدمين، وبداو العمال والمستخدمين كيهزو الكراسا والطوابل فالبلاصة لي فيها احتلال الملك العمومي، خرج مول الشي وكيدفع وكيجر الطوابل وكيعاود يحطهم”.

واكثر من ذلك، وفق الفيديو لي توفر عند “كود” هو أن مول المقهى كيجبد الطوابل من الكاميو وكيجرهم بزز، وكيقول معندكمش الحق وبلي هادشي لي درتو ماشي قانوني.

وأوضح لخصم بلي المستخدم لي قال ضربتو، كذوب، بحيث “هو لي جر طبلة من يدي وجرحني وعندي شهادة طبية، وديك تجرجير ديال الطبلة هو طاح، وعندنا فيديو ديال الطيحة لي طاح ومضربتوش”.

والغريب وفق لخصم، هو أن السلطة كتحرض محتلي الملك العمومي، مؤكدا بلي ديما كيرسل المراسلات للسلطة باش يحررو الملك العمومي ولكن لا مجيب. السلطة ضدو لأنه خدام ونزيه وكولشي كيعرفها.

شوهة كبيرة للسطة فهاد المنطقة، خاص لجنة مركزية توقف على الخروقات ديال السطلة من العامل للباشا للقياد للشيوخ للمقدمين. إيموزار منطقة كتستهل ناس مسؤولين بحال لخصم.

واش دبا يلا مدارش العامل خدمتو، مخصش رئيس الجماعة يتحرك ويخدم ويطبق القانون، راه خاص تحرير رؤساء الجماعة من تحكم وسلطوية رجال السلطة. راه هذا زمن التدبير الحر لي جابتو الجهوية المتقدمة وهذا زمن دستور 2011، واللي كيحن لزمن البصري فقد ولى.