سهام البارودي – كود//

مؤخرا بانو بزاف ديال الگروبات فوسائل التواصل الاجتماعي ديال بالمهاجرين من دول جنوب الصحراء القاطنين بالمغرب خاصين بالبيع و الشراء ديال منتوجات افريقية ! حتى لهنا ماكاين مشكل ! المشكل كايولي فاش كايوليو يتباعو فيه لحوم جاية من دول فحال الكوت ديفوار او غينيا او السينيغال و بلا خبار السلطات الصحية ! لحوم الحيوانات البرية لي la viande de brousse ! لي ممنوع الاستيراد ديالها فبزاف ديال الدول من بينهم فرانسا حيت كايشكلو خطر كبير.

اولا المصدر ديالهم مجهول ثانيا مامكونطروليهم تاواحد يقدر فحال البرد يكون فيهم شي مرض ( فاش بان مرض ايبولا كان تمنع ذبح و اكل الحيوانات البرية فمجموعة من دول افريقيا) ثالتا كايتم الطرونسبور ديالهم فالفارگونيطات لي كايشدو الطريق من الكوت ديفوار و كايمرو عبر السينيغال و موريتانيا باش يدخلو للمغرب فظروف اقل مايقال عنها انها ظروف ماكاتراعيش لشروط السلامة الصحية ! رابعا هادشي كامل كايتم غالبا بطريقة سرية و حتى عملية البيع كادوز بلا خبار السلطات عن طريق الفايسبوك او الواتساب. السلطات خاصها تفيق لهادشي راه صحة المهاجرين و المواطنين في خطر. راه لاكانو كايدخلو بلا مايتكونطرولاو من طرف السلطات الصحية مصيبة و لاكانو كايدخلو بلا خبار الدولة مصيبتين !