كود الرباط//

توصلت “گود” بشهادات سكان إقامة جنان الزهراء بعين عتيق، القريبة من مدينة الهرهورة، تفيد بأن الإقامة أصبحت مرتعا للحشرات والكلاب الضالة والثعابين السامة، مما يشكل خطرا على صحة الساكنة خصوصا الأطفال والمسنين.

وكشف فيديو اطلعت عليه جريدة “گود”، أن ثعبان سام وهائج تهجم على العمارة، وكان غيصيب أحد رجال الأمن الخاص.

ماشي المرة الأولى للي كيهجمو الحيوانات والحشرات والكلاب الضالة على هاد الإقامة، بحيث هي ديما عرضة لهادشي، في ظل غياب تام لمصالح الجماعة اللي عندها ميزانية خاصة لمحاربة الحيوانات الضارة.

يشار بلي  وزارة الداخلية كتخصص ملايين الدراهم وكتعطيها للجماعة باش تحارب الحشرات وتعالج الكلاب الضالة وتحمي السكان، لكن بحال عين عتيق اللي راها أصلا ف دار غفلون، لا رئيس ولا أغلبية كتخدم، مقابلين مصالحهم وصافي ومبرعين بالامتيازات.

غير على بعد كلمترات قليلة عن مدينة الرباط، عاصمة الأنوار، كتعيش مدينة عين عتيق على واقع تنموي هش، إذ لا تزال بعض المناطق فيها لا تتوفر على أدنى شروط العيش الكريم في بلد مقبل على تنظيم مونديال 2030.

فمن الدخلة ديال هاد المدينة للخرجة ديالها، حفر كبيرة وأزبال منتشرة وظاهرة الخطافة، أشياء تخطف الأنظار في أحياء هذه المدينة.

وكيف عاينت “كود” سابقا، من المقاطعة للباشوية لمقر البلدية ومقر الدرك الملكي، كلها بنايات لا تتوفر على حد أدنى من شروط السلامة الصحية، بحيث أن اغلبها بلا طواليتات. وكيف قالت موظفة بالباشوية لـ”كود”: ”انا مريضة وكنحتاج طواليت وراها مسدودة والماء مكاينش خصني نمشي لواحد كافي قريبة نطلبهم على الماء”.

ماشي غير الطواليتات لي مكاينيش، الفوضى تعم الباشوية، لا تنظيم ولا وجود لموارد بشرية كافية، خصوصا في ظل المشاكل المتراكمة عند ساكنة عين عتيق.

وضعية هاد المدينة عجيبة، فيها مصانع الاسمنت ومحلات تجارية كثيرة اضافة الى سوق اسبوعي كبير لي فيها محلات مسدودين عامرين أزبال وبـ”الخرا ديال البشر والحيوان” وبالقرب منها كيتباع اللحم يوم الاربعاء، يعني مداخيل ضريبية مهمة، ولكن مكاين  انعكاس على التنمية فهاد المدينة المنسية..