كود – عثمان الشرقي//

من بعد ما علنو الفنانين أحوزار ولحسن الخنيفري  على توقيف الحفلات ديالهم بسبب الظروف الجوية القاصحة والفيضانات اللي عرفاتها بزاف ديال المناطق فالمغرب، خرج  الفنان لحسن الخنيفري وقال  بدورو أنه غادي يوقف جميع حفلاتو هاد الأيام  تضامنًا مع ساكنة منطقة الغرب المتضررين من الفيضانات وخا أنه  كانت عندو سهرة كبيرة نهار 8 فبراير  فتمارة.

لحسن  الخنيفري ما وقفش غير عند قرار التوقيف، ولكن  طرح واحد السؤال مهم، وقال: “أش غايستافدو هاد الناس لي تضررو إلى وقفنا  الحفلات، واش غادي  يستافد  شي واحد؟ كيفاش غادي نعاونو الناس بهاد الطريقة؟”.

وزاد لحسن قال: التضامن الحقيقي خاصو يكون عملي وماشي غير رمزي، واقترح يتدار صندوق خاص للمساعدة والتبرعات باش يتجمع الدعم المادي ويمشي مباشرة للناس المتضررين .

وأكد الفنان أنه مستعد يساهم مني قال: “أنا مستعد نتبرع، ولكن ايلا وقفنا دابا الحفلات حتى حد ما غادي يستفيد، وختم كلامو بالتأكيد على أن التضامن خاصو يكون بالفعل ماشي بالتوقيف، وبالعمل الميداني اللي كيحسّس الناس المتضررين بالوقوف الحقيقي معاهم فهاد الظروف الصعيبة .

كيف ما شار أن ناس الغرب خدم عتدهم وكلا واشرب معهم ولكن التوقيف ماشي حل، وزاد قال ”شي فنانين الله يهديهم غير كيحلو تلفون وكيبقاو يوقفو فالحفلات ’’اما بالنسبة للناس لي انتقدوه فقال ”ها حنا وقفنا اوا تفرجو فينا دابا“