كود سبور//

كايتسنى المنتخب الوطني المغربي النسوي لكرة القدم داخل القاعة، ماتش مهم وقوي فدومي فينال كأس إفريقيا للفوتسال د العيالات.

ولاعبين المنتخب الوطني المغربي النسوي للفوتسال، ضد منتخب أنگولا اليوم الاثنين مع 8 الليل فقاعة تيران مولاي عبد الله بالرباط.

ويعتبر هذا الماتش ضد أنگولا، اختبار حقيقي للمنتخب الوطني المغربي النسوي للفوتسال، اللي مشارك لأول مرة فمسابقة قارية، وقدر يقدم فيها مستويات كبيرة فالدور الأول ويوصل للدومي فينال.

ونجح المنتخب الوطني المغربي للفوستال بقيادة المدرب عادل السايح فالتأهل للدومي فينال، بعدما ربحو كل من ناميبيا فالجولة الأولى من مرحلة المجموعات بنتيجة 8 لواحد، وربحو منتخب الكاميرون فالجولة الثانية بنتيجة 7 لواحد، وتصدرو الگروب الأول برصيد 6 النقاط.

أما منتخب أونگولا، ف تأهل للدومي فينال بعدما احتل المركز الأول فالگروب 2 برصيد 6 نقاط، برباح على غينيا فالجولة الأولى بنتيجة 5 لجوج، ورباح فالجولة الثاني على مصر بنتيجة 3 لواحد.

المنتخب الوطني المغربي لعيالات الفوتسال، متوفرة له كل الظروف باش يمشي لأبعد نقطة فأول نسخة من كأس إفريقيا للسيدات، من خلال الخدمة اللي دايرين الجامعة الملكية المغربية لكرة القدم، برئاسة فوزي لقجع اللي كايجي شخصيا يتفرج فيهم ويساندهم، ونفس الشي بالنسبة لهشام الدگيگ مدرب المنتخب المغربي للفوتسال رجال اللي ديما حاضر فالتيران وكايشجعهم ومعاونهم هما ومدربهم عادل السايح.

وخاص دابا غير الدعم ديال الجمهور، ويجيو لقاعة تيران مولاي عبد الله فالرباط، كثر من الماتشات اللي فاتو باش يشجعو اللبؤات على تحقيق التأهل لدومي فينال كأس إفريقيا للفوتسال، حيث الماتشات الأول والثاني ضد ناميبيا وضد الكاميرون كان فيه الجمهور قليل، وبالمقابل وفنفس الوقت من العام اللي فات فاش كان المنتخب المغربي للذكور لاعب كاس إفريقيا للفوتسال بنفس القاعة كان الحضور كبير بزاف.

وهذا الشي كايعكس الذكورية اللي مازال كاينة فعقلية الجمهور، وهذا الشي عندو ارتباط بالجانب الاجتماعي، والمجتمع المدني خاصو يزيد يدير خدمتو باش يتزاد الوعي بالمساواة بين المرأة والرجل حتى فالرياضة وكرة القدم المختلفة.