كود ـ الرباط//

كما هو معلوم تم تحديد المؤتمر  الوطني الخامس لحزب الأصالة والمعاصرة أيام 9 و10 و11 فبراير 2024 ببوزنيقة.

ولكن والله واحد من رؤساء اللجان المنبثقة عن اللجنة الوطنية لي كيترأسها سمير كودار، لي هي لجنة اللوجيستيك والاستقبال والإعداد والإعلام، ولجنة فرز العضوية، ولجنة الوثائق المذهبية والبرامج والوثائق السياسية، ولجنة الشؤون القانونية والإدارية، ولجنة البيان الختامي، ولا أعضاء المكتب السياسي ولا الوزراء ولا البرلمانيين ولا رؤساء المجالس عارف شكون لي غادي يكون هو الأمين العام للحزب.

أكثر من هذا ما عرفين حتى لي غادي يترشح، واخا دايرة الهضرة على ثلاثة د الوزراء لي هما فاطمة الزهراء المنصوري شفاها الله، والمهدي بنسعيد ويونس السكوري.

وديك اللعيبة ديال خص المرشح لمنصب الأمين العام، يكون قضى سنة في العضوية ديال المكتب السياسي ولي نصو عليها في القانون مامنهاش، وتقدر تغير خلال المؤتمر، ويطلع شي اسم جديد ما كان عارفو حتى واحد.

وتيروج في الكواليس اسمين كبيرين يقدر يترشح شي واحد منهم للأمانة العامة باش يخدم على تيساع ويوجد راسو لرئاسة الحكومة المقبلة.

الاسمان هما فوزي لقجع والتراب الباطرون ديال الفوسفاط.