كود – كازا ///

قالت جريدة “أوكدياريو” الإسبانية، إن الحرس المدني الإسباني شد، مؤخرا، شخص من أصل مغربي بسباب الاشتباه فارتكابه جريمتي اعتداء جنسي باستعمال مخدرات كيميائية فمدينة نيرخا (مالگة).

وأضافت الصحيفة الإيبيرية، أن المتهم كان يستغل السوشيال ميديا باش يكسب الثقة ديال الضحايا ديالو ويعرض عليهم للدار ديالو، كيف طرا مع الضحايا اللي عندهم على التوالي 27 و34 عام.

وصرحو الضحايا أنهم وبعد اتصال أولي لكسب الثقة ديالهم غرض عليهم لدارو وقدم ليهم شرابا ومباشرة حسو بالعيا الغثيان والدوخة ولقيء، ومن بعد ما بقو عاقلين على والو. وف الصباح فاقو لقاو راسهم باقين فالدار، وشكو فاللي وقع ليهم ومشاو دارو تحليلات.

وكشفت نتايج الاختبارات اللي تجرات لهم، تعاطيهم لمواد مخدرة مختلفة – عقار إم دي إم إيه، والقنب، والميثادون – بلاما يكونو مستهلكين ليها. كما ثبت تعرضهم للاغتصاب. وأمرات السلطة القضائية بحبس المتهم. ومزال التحقيق مفتوح بسباب فرضية ظهور ضحايا آخرين.