الرئيسية > آراء > لاكاين شي درس خاصنا نتعلموه من هادشي لي واقع فاتفاقية التبادل الحر مع تركيا فهوا النهوض بالاقتصاد المغربي باش يواجه السوق العالمية! مايمكنش نفس مول الحانوت لي كايتشكا من بيم و باغيه يسد يكون كايزيد على الزبون فالثمن و كايطفي الثلاجة فالشتا!
17/02/2020 15:00 آراء

لاكاين شي درس خاصنا نتعلموه من هادشي لي واقع فاتفاقية التبادل الحر مع تركيا فهوا النهوض بالاقتصاد المغربي باش يواجه السوق العالمية! مايمكنش نفس مول الحانوت لي كايتشكا من بيم و باغيه يسد يكون كايزيد على الزبون فالثمن و كايطفي الثلاجة فالشتا!

لاكاين شي درس خاصنا نتعلموه من هادشي لي واقع فاتفاقية التبادل الحر مع تركيا فهوا النهوض بالاقتصاد المغربي باش يواجه السوق العالمية! مايمكنش نفس مول الحانوت لي كايتشكا من بيم و باغيه يسد يكون كايزيد على الزبون فالثمن و كايطفي الثلاجة فالشتا!

سهام البارودي – كود//

مؤخرا نايضة ضجة على اتفاقية التبادل التجاري لي كاينة بين المغرب و تركيا ! الضجة لي كان فيها تهديد بالغاء الاتفاقية من الطرف المغربي قبل ماتقبل تركيا بأنها تراجع بنود الاتفاقية مع المغرب !
من الحوايج لي بانو فخضم هاد الصراع بين المغرب و تركيا هوا فرحة بعض البقالة فوسائل التواصل الاجتماعي بخبر ” اقفال محلات بيم” الخبر لي ماشي صحيح بطبيعة الحال و لكن حيت هوما كايشوفو بيم فيه تهديد للبقال المغربي طبعا غايفرحو و غايساينوه يسد ! و لكن السؤال لي خاصنا نطرحوه على راسنا هوا واش بهاد الطريقة هادي غادي نقذوا الاقتصاد الوطني ؟ واش لاسدينا على راسنا من تركيا و سدينا بيم و منعنا المنافسة بهاد الطريقة غادي نقذوا الاقتصاد ؟
طبعا لا ! و أي انسان قاري شوية ديال الاقتصاد غادي يقوليك بلي المغرب خاصو يطور التنافسية ديالو فمجموعة ديال القطاعات باش يقدر ينافس دول اخرى ! التنافسية هي الحل، الدول غاديا و كاتنفاتح على العالم الخارجي ( الا كوريا الشمالية) و حتى حنا خاصنا ننفاتحو و باش ننفاتحو بكل اريحية خاص الاقتصاد ديالنا يكون واجد لهادشي !
تركيا راها القوة الاقتصادية السابعة فأوروبا و الخمسطاش فالعالم ! من احد اقوى الاقتصادات فالشرق الاوسط ، و لي مشا لتركيا غادي يحس بالقوة الاقتصادية ديالهم ! غاتحس بيها و نتا كادور بين حوانت الحوايج باش دير الشوبينغ فاش غاتشوف شحال ديال الحوايج مصنوعين فتركيا و عندهم جودة مزيانة و ثمن فالمتناول ! غاتحس بيها و نتا كاتقدا من السوبر ماركت و كاتشوف الاعداد الهائلة ديال الماركات الوطنية لي عندها جودة عالية و ثمن مناسب ! غاتحس بقوة الاقتصاد فالطرق و الشوارع و الجسور لي كاتقطع البوسفور !

بعيدا عن الخلافات السياسية لي يمكن تكون عندنا مع تركيا و لكن هادشي ماكايمنعش انها دولة ناجحة اقتصاديا و عندها اقتصاد اقوى من ديالنا و مصنف مع الاقتصادات العالمية!

المشكلة عندنا احنا اكبر من هاد الاتفاقية ديال التبادل لي عندنا مع تركيا و العجز لي فيها ! حيت عندنا عجز مع تركيا و عجز مع ميريكان و مع الاتحاد الاوروبي و غايكون ديما عندنا عجز طالما اننا ماعندناش اقتصاد وطني قوي قادر على المنافسة ! خصوصا فمجالات فحال التيكستيل و الصناعات الالكترونية …

كاينة التنافسية من جهة و كاين اقتصاد الريع ( فحال فاش دخلات شركة اوبير للمغرب و خرجوها مالين الگريمات لي مابغاوش شي واحد ينافسهم فقطاع النقل ) و كاين المشكل الثالت و الكبير ديال الاقتصاد الغير المهيكل و لي كايشكل نسبة كبيرة بزاف من الاقتصاد الوطني ! بنادم خدام فالنوار ! كايدخل الفلوس فالنوار ! ماكايخلصش السينيسيس د الخدامة ماكايخلصش ضرائب للدولة و كايقدر يبيع باثمنة هابطة بالمقارنة مع هاداك لي حال حانوت بطريقة قانونية و لا داير وزين بطريقة قانونية !

حتى من مالين الحوانت و لي كايشكلو الجزء الاكبر من التوزيع فالمغرب ماطوروش على شنو كانو كايديرو هادي خمسين عام ! بزاف منهم كايتشكاو من بيم اليوم و لكن ماقادينش يوفرو الخدمات لي كايوفرها بيم ! كاين مول الحانوت لي ماكايبغيش يشعل الثلاجة فالشتا ! كاين لي كايزيد فالثمن ! كايغش فالميزان ! كايتعامل بالتخنزيرة ! كايحط القراعي د الما د البلاستيك مقابلين مع الشمش ! كاين مول الحانوت لي ماكاينظفش المحال ديالو و الثلاجات ديالو و لاقلبتي الحانوت تلقا عندو البخوش و الفيران كاينقزو على السلعة بالليل ! كاين مشكل كبير ديال الخدمة و النظافة و الشفافية فالاثمنة ! هاد المشاكل لي ماكاينينش فبيم ! اغلب محلات بيم نقية، منظمة، جميلة و الناس لي خدامين فيه لطاف و كايتعاملو مزيان مع الزبون و هادا هوا الدرس لي خاص يتعلمو مول الحانوت و لي بزاف رافضين يتعلموه!

الاقتصاد ديالنا عندو بزاف د المشاكل و باينة ماخافية على حتى واحد! التنافسية ! اقتصاد الريع ! القطاع الغير المهيكل و عقلية الخدمات و الكليان و الزبون الملك … نهار هادشي غايتحسن غانقدو ديك الساعة نشرعو البيبان للاجانب يدخلو ويجيبو سلعتهم و افكارهم و مشاريعهم و استثماراتهم و مرحبا بيهم حيت ديك الساعة غايكون عندنا اقتصاد وطني قوي قادر على المنافسة و المستفيد الاول و الاخير من المنافسة شكون هوا ؟ الزبون طبعا

موضوعات أخرى

01/04/2020 22:00

الدكتور خاتوف رئيس قسم الإنعاش بالمركز الاستشفائي الجامعي الحسن الثاني بفاس لـ”كود”: ها فوائد الدوا ديال “كورونا” -فيديو