كود الرباط//
وقّع وزير العدل، عبد اللطيف وهبي، مع نظيره بجمهورية إفريقيا الوسطى، دجوباي أبازيني أرنو، مذكرة تفاهم للتعاون فمجال الإدارة القضائية، فخطوة جديدة كتكرّس توجه المغرب لتعزيز التعاون جنوب–جنوب وتقوية حضوره داخل القارة الإفريقية.
وجا توقيع هاد الاتفاق بمقر وزارة العدل فالرباط، وسط تأكيد رسمي من الطرفين على أهمية تطوير الشراكات الإفريقية، خاصة فمجال تحديث العدالة وتقوية الحكامة القضائية.
وهبي شدّد، فتصريحو، أن هاد الاتفاق كيعكس “عمق العلاقات” بين المغرب وإفريقيا الوسطى، وكيترجم إرادة مشتركة باش يتطوّر التعاون القضائي، خصوصاً عبر رقمنة العدالة وتحديث الإدارة القضائية، مع التركيز كذلك على مواجهة التحديات المشتركة، وعلى رأسها الجريمة المنظمة.
من جهتو، نوه وزير العدل ديال إفريقيا الوسطى بالدور اللي كيلعبو المغرب فالقارة، سواء على مستوى دفع التنمية داخل الاتحاد الإفريقي أو فمجال الاستثمار والتعاون بين الدول الإفريقية، مشيداً كذلك بالمقاربة المغربية فملف الهجرة، اللي كتجمع بين البعد الإنساني ومحاربة الاتجار بالبشر.
المذكرة الجديدة كتهدف لإرساء إطار عملي لتبادل الخبرات بين البلدين، سواء فالتكوين ديال القضاة والأطر الإدارية، أو فتنظيم وتدبير المحاكم. كما كتهم تطوير آليات العدالة البديلة، بحال الوساطة والتحكيم، باش يتسرّع البت فالقضايا ويتحسّن الأداء القضائي
الاتفاق كيعطي أهمية خاصة حتى للفئات الهشة، خصوصاً النساء والأطفال، عبر تسهيل الولوج للعدالة، إضافة لتبادل التجارب فمجال اللوجستيك القضائي وتطبيق الاتفاقيات الدولية، وتنظيم زيارات وندوات مشتركة بين الجانبين.
هاد الخطوة كتدخل فإطار استراتيجية أوسع للمغرب، اللي كيراهن على تقاسم الخبرات مع الدول الإفريقية وتعزيز دولة الحق والقانون، فواحد السياق كتعرف فيه القارة تحديات كبيرة على المستوى القضائي والأمني.
