كود كازا///

فسخ محمد الطاوس، اللاعب ديال فريق الرجاء الرياضي، العقد ديالو مع الفريق ومشا دعاهم في الجامعة، بعدما قرر الفريق استغني على الخدمات ديالو مني وضعوا غاريدو في لائحة الانتقالات.

الطاوس طلبوه مسؤولين الرجاء باش اتنازل على شوية ديال لفلوس وفسخ العقد ديالو بالتراضي، ولكن مبغاش وحلف ميتنازل على ريال واحد، وطالب بمستحقاتو كاملة، والمسؤولين رفضوا استاجبوا للمطالب ديالو داكشي علاش حيدوه من اللائحة النهائية للرجاء.

اللاعب الرجاوي تسنى حتى سالات فترة الانتقالات باش اتأكد من أنه مكينش فاللائحة ومشا وضع شكاية في الجامعة بالرجاء، خصوصا أنه مواخدش فلوسو والأجور الشهرية ديالو.

القانون كيقول أن أي فريق كيحيد شي لاعب من اللائحة ديالو وهو عندو عقد معاه كيعني هذا أنه فسخ العقد من طرف واحد وأن الفريق خصوا اخلص للاعب جميع المستحقات المالية ديالو.

وغادي اكون الطاوس هو ثاني لاعب كيمشي للجامعة ضد الرجاء بعد يوسف القديوي لحتى هو مخداش فلوسو وفسخ العقد ديالو مع الرجاء عن طريق الجامعة، وكيطالب دابا بمليار و200 مليون.