كود سبور//

مهدد الأرجنتيني بريستياني لاعب بنفيكا البرتغالي بعقوبة قاصحة من الاتحاد الأوروبي لكرة القدم، بسبب العنصرية فماتش الفريق ضد ريال مدريد الإسباني، اللي تلعب البارح الثلاثاء ضمن دوري أبطال أوروبا.

البارح الماتش بين بنفيكا وريال مدريد توقف بعدما توجه البرازيلي فينيسيوس جونيور لعند الحكم وهضر معه، والحكم دار واحد الإشارة بيديه ضد العنصرية وتوقف الماتش قبل ما يكمل، وبينت الكاميرات أن السبب اللي خلى فينيسيوس يطلب يمشي عند الحكم، هو أن بريستياني مشى عند فينسيوس وغطى فومو بالتوني وقال له شي كلام يشتبه أنه كلام عنصري.

وفتصريح له قال الفرنسي كيليان مبابي لاعب ريال مدريد، إنه كان قريب من الحادث اللي وقع لفينيسيوس، وسمع بريستياني شنو قال، وكشف فتصريح له: “لاعب بنفيكا رقم 25، ما بغيتش نقول سميتو، قال هضرا ما زويناش، دار التوني على فمو وقال لفينيسيوس قرد خمس مرات، وسمعتو وسمعت حتى شي لاعبين آخرين من بنفيكا”.

أما فينيسيوس حط سطوري على إنستغرام، شرح فيه شنو وقع له، وقال: “العنصريون، قبل كل شي، راهم خوافين، وخاصهم يغطيو فامهم بالتوني باش يبينو شحال ضعاف، ولكن عندهم حماية من الآخرين، اللي خاصهم هما يعاقبوهم، وهذا الشي اللي وقع ماشي جديد عليا وعلى عائلتي”.

وكمل نجم ريال مدريد: “خديت الصفرا حيث احتفلت بالهدف اللي ماركيت ومازال ما عرفت السبب على خديتها”.