كود سبور- فيلادلفيا//

عبرو اللاعبين ديال الوداد الرياضي على الأسف ديالهم حيث خسرو مع مانشستر سيتي النگليزي، اول ماتش من كاس العالم للاندية فالميريكان، ولكن قالو انهم فرحانين بالمستوى اللي قدموه، وأنهم غايديرو جهدهم الماتش الجايين ضد يوفنتوس الطالياني والعين الاماراتي باش يفرحو الوداديين والمغاربة.

وقال اوبينگ لاعب الوداد الرياضي فتصريح له بعد الخسارة مع مانشستر سيتي: “ما كانش الماتش ساهل ولعبنا معركة اليوم ضد مانشستر سيتي، وتعاملنا مزيان مع المباراة واخا خسرنا، ما حطيناش يدينا وخلقنا فرص، وجمهورنا شجعنا الماتش كامل وهما نقطة القوة ديالنا ومعنا فالمونديال كل”.

وكمل أوبينگ: “دابا خاصنا نستافدو من الحوايج الإيجابيين فهاد الماتش، ونوجدو الماتش ضد يوفنتوس باش نديرو شي نتيجة مزيانة وراه كلشي ممكن”.

اما فهد موفي، فقال: “كان الماتش مزيان ضد مانشستر سيتي، وكنا متوقعين هذا الشي ولكن بينا قيمة الوداد اليوم، الماتش جاي حتى هو ضد فريق كبير (يوفنتوس) وغانحاولو نفرحو الجمهور ديالنا اللي كايجي يشجعنا حتى لهنا”.

عزيز كي لاعب الوداد الرياضي حتى هو قال: “قدرنا ماتش كبير والأداء ديالنا كان إيجابي وهذا الشي غايحفزنا للماتشات الجايين وعلاش لا نربحو اليوفي العين”.