كود سبور//

غيعيدو لاعبين المنتخب الوطني المغربي الأولمبي هذا العيد الكبير بمركز محمد السادس لكرة القدم، اللي باركين فيه مدة هادي، حيث كيلعبو كأس إفريقيا لأقل من 23 عام.

المنتخب المغربي الأولمبي اللي ضمن التأهل إلى دومي فينال كوب دافريك  U23، اللاعبين ديالو والطاقم التقني غيدوزو أجواء عيد الأضحى غدا الخميس بمركز محمد السادس لكرة القدم، والجامعة الملكية المغربية لكرة القدم غتسهر كيف العادة باش توفر لهم جميع الظروف باش تخلق لهم جو عائلي وما تخليهمش يحسو أنهم معيدين بعاد على عائلاتهم.

وكان المنتخب المغربي الأولمبي ربح البارح منتخب غانا بنتجية 5 لواحد، ضمن الجولة الثانية من كأس إفريقيا لأقل من 23، وهذا الشي خلاه يرفع الرصيد ديالو إلى 6 نقاط وينفرد بصدارة المجموعة A، ويضمن التأهل إلى نصف النهائي ومازال عندو ماتش ضد الكونكو ضمن الجولة الثالثة، فانتظار يعرف شكون الخصم ديالو فالدومي فينال من لكروب.