كود سبور//

تأكد تاني أن أغلب لاعبين منتخب السنغال، متعودين على الشغب وعدم تطبيق القانون على المشاغبين فالتيرانات، بحالهم بحال مدربهم بابي ثياو اللي حرض اللاعبين ديالو على الانسحاب من نهائي كاس أفريقيا 2025، غير حيث الحكم د الماتش اعلن على بينالتي مستحق للمنتخب الوطني المغربي.

هذه المرة خرج لاعب السنغال بابي سار، كايخرج فعينيه، وكايقول بلي الـ18 مشجع سنغالي اللي مشدودين فالمغرب كايتحاكمو على خلفية أحداث الشغب اللي ارتكبو فالفينال ديال كاس أفريقيا أبرياء واخا العالم شاف الإجرام اللي دارو واعتدائهم على ليسطاديي والمصورين الصحافيين وأنهم كانو باغيين يقتحمو أرضية الملعب لولا تدخل الأمن المغربي فالوقت المناسب اللي وقفهم عند حدهم.

هاد اللاعب السنغالي باغي يربح شويا ديال التعاطف من الجمهور السنغالي ويكبر الشعبية ديالو، وناض نشر سطوري فانستغرام كايقول فيه: “30 يوم من الاحتجاز لمشجعين ما دارو حتى شي ذنب من غير تشجعيهم الحماسي لفريقهم، ندين بشدة الظلم ونطالب بالإفراج عليهم”.

اللي غادي يقرا هذا الشي اللي كتب اللاعب السنغالي بابي سار، وشاف شنو دارو المشجعين السنغاليين اللي كايدافع عليهم فالتيران من شغب وأعمال عنف، غادي يقتنع أن هذا اللاعب وصحابو فالمنتخب السنغالي مولفين على العنف فالتيرانات وعدم تطبيق القانون على المشاغبين، وأنهم تحددت لهم السرعة فالتيران المغربي وغادي يتطبق عليهم القانون بحالهم بحال أي واحد ارتكب أعمال شغب فالتيران.