كود سبور//

ناضت ملي سالا ماتش دومي فينال كوبا أميريكا بين الكولومبيا والأوروگواي، فالساعات الاولى من صباح اليوم الخميس فتيران بنك أوف امريكا فمدينة شارلوت فالمريكان

وملي سالا الماتش بين الاوروگواي وكولومبيا بنتيجة واحد لزيرو لمصلحة الكولومبيين وتأهلهم إلى نهائي كوبا أمريكا، ناضت مضاربة بين لاعبين منتخب الاوروگواي وكولومبيا، وبطلها داروين نونيز مهاجم الاورگواي وليفربول النگليزي و10 اللاعبين مع الاوروگواي، اللي طلعو حتى للمدرجات وتشناقو مع مشجعين ديال كولومبيا، قبل ما يتدخل الأمن الأمريكي ويفرقهم.

وخرج اتحاد امريكا الجنوبية منظم كوبا امريكا، واعلن فبلاغ له انه فتح تحقيق فأحداث الشغب اللي وقت فماتش الاوروگواي وكولومبيا، أما خوسي ماريا خيمينيز كابيتان أوروگواي، برر صعود صحابو للمدرجات والمضاربة ديالهم مع جمهور كولومبيا بأنها كانت للدفاع على العائلات ديالهم من الجماهير الكولومبية.