گود سبور//

خرجو لاعبات المنتخب الوطني المغربي النسوي المشارك فكاس أفريقيا د العيالات، يوكلو شي مشاش فالشارع وسط جدل كبير فالمجتمع المغربي بخصوص مقتضى جديد تصادق عليه مؤخرا كايمنع إطعام الحيوانات ديال الزنقة.

خديجة الرميشي الگولة ديال المنتخب المغربي وصحبتها المدافعة عزيزة الرباح خرجو اليوم الاثنين يضربو دويرة مع اللاعبات فلاكوط قبل ماتش السنغال، وهما يبداو كايوكلو لمشاش ديال الزنقة الفروماج والما.

وللإشارة صادق مجلس المستشارين قبل أسابيع على مشروع القانون رقم 19.25 لي كيتعلق بحماية الحيوانات الضالة والوقاية من الخطر ديالها، فخطوة جديدة كتهدف لتنظيم التعامل مع الكلاب والمشاش، وحماية المواطنين والحيوانات فدقة وحدة.

ومن بين أهم المقتضيات ديالو أنه كيحدد بلي تربية ولا مداوية ولا إعطاء الماكلة للحيوانات الضالة خاص يكون وسط المراكز المرخصة والمخصصة لهاد الغرض، باش تستافد من التتبع البيطري والرعاية اللازمة. وأي مخالفة لهاد القانون يمكن يعرض مولاها لخطية مابين 1500 و3000 درهم.