كود سبور//

ما بغاوش لاعبات المنتخب الإيراني يغنيو النشيد الوطني ديال بلادهم فالماتش الأول لهم فكاس آسيا المقامة فأستراليا وهو الماتش اللي كان ضد كوريا الجنوبية، وهذا الشي احتجاجا على اللي واقع فإيران من قمع النظام الإيراني للشعب د بلادو وجر البلاد لحرب مع دولة قوية إقليميا بحال إسرائيل وأعظم قوة فالعالم الميريكان، مع العلم أن هذا الشي كان ممكن النظام الإيراني يتجنبو كون انفتح على راسو وعلى المعارضة وبادر لمفاوضات جادة مع الميريكان حول المشروع النووي الإيراني ووقع حملات التشيع اللي كايمولها فعدد من دول العالم والتدخل فالشؤون الداخلية ديالها.

اللاعبات الإيرانيات دخلو للتيران ومع بدا عزف النشيد الإيراني قبل الماتش ضد كوريا الجنوبية، ما بغاوش يغنيوه وبقاو واقفات وساكتات، وهاذ الشي فيه ميساج وتعبير منهم على عدم تقبلهم لشنو كايدير النظام الإيراني فبلادو وشعبو وقمع احتجاجات الإيرانيين فالشارع، وراه ماشي أول مرة يديرو شي رياضيين إيرانيين خطوة احتجاجية بحال هادي، حيث فايت دارها منتخب الرجال فمونديال 2022، ملي دخلو اللاعبين الإيرانيين للتيران وما بغاوش يغنيو النشيد الإيراني احتجاجا على قمع النظام الإيراني لمظاهرات كانت كاتعيشها البلاد.

للإشارة فالمنتخب الإيراني د الرجال ممكن ما يشاركش فمونديال 2026، فالميريكان وكندا والمكسيك، بسبب الحرب اللي داخلينها دابا الإيرانيين مع إسرائيل وميريكان، وهي الحرب اللي عرفت خسارات كبيرة للإيرانيين فثلاثة أيام الأولى حيث تقتلو لهم أهم ركائز النظام وأولهم راس النظام الإيراني المرشد ديالهم علي خامنئي.